PoliticaFeatured

Parlamentario Shailiny Tromp-Lee (MEP): Studiante di islanan como punto importante riba agenda di tripartiet

Parlamentario Shailiny Tromp Lee

Nos studiantenan ta encontra varios reto na momento cu nan ta tuma e decision di bay studia na Hulanda. E retonan aki no ta solamente conoci pa nos, mandatario di e islanan, pero tambe pa e gobierno di Hulanda. Den e rapport di Nationale Ombudsman di 2020 y tambe di 2022, a base di diferente investigacionnan a sali na cla diferente perspectiva y tambe diferente conseho di con nos por percura pa surpasa e retonan cu nos studiantenan ta encontra. 

Reto di nos studiantenan

Den pasado a duna hopi atencion na e BSN-nummer, cual ta un number necesario pa e studiante por habri un cuenta di banco por ehempel. Por bisa cu danki na e plataforma di IPKO, e determinacion di e islanan y e cooperacion cu Gobierno di Hulanda awor a logra formalisa esaki pa nos studiantenan. Pues nan no tin cu warda te ora cu ta na Hulanda pa haya nan BSN-nummer. Maske cu nos ta contento cu a logra esaki, ainda e logro aki no ta suficiente pa nos yiunan di tera y e Nationale Ombudsman ta comparti e opinion aki. Paso mescos cu e BSN-Nummer, tin hopi otro retonan cu ta haci e caminda di nos studiantenan un poco mas dificil. Por pensa riba por ehempel e problema cu vivienda, inburgering y escogencia di estudio. Pa loke ta inburgering por pensa riba e cultura Hulandes, e lenguahe, pero tambe e aspecto fiscal. Paso unabes cu nos studiantenan haya nan mes cu belasting pa paga, nan mester sa cua caminda pa cana, cua instancia pa acudi y con pa haci esaki tambe. 

Desaroyonan pa cu e retonan

Por bisa cu e Gobiernonan ta tratando e tema aki den nan vierlandenoverleg tambe. Aki Gobiernonan a palabra cu nan lo bay traha mas dirigi riba e retonan y lo presenta solucionnan concreto pa esakinan. Sin duda, trahando hunto nos lo brinda nos studiantenan un mihor porvenir, nos lo empodera nan y asina aporta na nan exito unabes cu tuma e decision di bay studia afo. 

Pa finalisa, nos como e parlamento di e islanan a palabra cu nos ta bay monitorea nos Gobiernonan activamente riba e topico aki. Prome, nos lo bay monitorea con nan ta atende cu e retonan aki nan mes, si esaki ta keda riba nan agenda. Tambe nos ta bay monitorea con nan ta haci uzo di e consehonan cu e Nationale Ombudsman a brinda den su rapport. 

Related posts

Prome Minister Evelyn Wever-Croes: Prome minister ta felicita BIA y DRH

EA News Author

Un profesional medico cu ta alaba mal maneho di salubridad ta mal señal pa politica na aruba

EA News Author

Anuncio di Morto: Jamil Tromp

EA News Author

1 comment

Leave a Comment

Whatsapp Message