Diasabra anochi Parlamentario Xiomara Maduro tabata presente na Centro di Bario Noord pa asina disfruta y duna apoyo na e evento Vibracion Cultural cu ta forma parti e proyecto Bario Unico.
E meta di Vibracion Cultural ta pa trece e bario hunto pa asina den union disfruta di bon musica, cuminda, artesania y ambiente unico crea door di nos localnan.
Vibracion Cultural ta wordo organisa pa CEDE Aruba den cooperacion cu e Centro di Barionan, ATA, UNOCA y colaboracion di Fonds Voor Podiumkunsten.
E evento a conta cu presentacion di varios talento local nobo cu a deleita e publico presente cu nan musica, cuminda y artesania.
“Tabata bunita pa mira local y turista disfruta di e ambiente unico cu a reina den Centro di Bario Noord. Nos ta spera cu pronto mas bario por haya e oportunidad unico aki di comparti e vibracion cultural di nan districto y nan centro di bario,” ta palabranan di apoyo expresa pa Parlamentario Maduro cu tambe a disfruta di e dushi ambiente cu a reina durante Vibracion Cultural na Centro di Bario Noord.
