Diadomingo miembronan di fraccion AVP den Parlamento di Aruba a uni na e comunidad Colombiano pa celebra e 214 aniversario di Independencia di Colombia. E celebracion a inclui misa y otro actividadnan cultural, cu un ambiente yena di union y alegria.
President di Parlamento Marlon Sneek y lider di fraccion Jennifer Arends-Reyes a asisti misa na Iglesia Birgen di Fatima na Dakota, mientras cu parlamentarionan Dennerich Kelly y Stephanie Sevinger a uni cu e comunidad na Iglesia Inmaculada Concepçion na Santa Cruz.
Delegacion di AVP ta gradici comunidad Colombiano pa e invitacion y pa e oportunidad pa participa den un dia asina importante. Nan ta reconoce e contribucion valioso di comunidad Colombiano riba nos isla, tanto den nivel social, cultural como economico.
E relacion entre Aruba y Colombia ta multifacetico y solido, basa riba respet mutuo, integracion y lazo humano. Celebrando e 214 aña di libertad y soberania di Colombia, AVP ta desea tur Colombiano – tanto aki na Aruba como na Colombia – hopi felicidad, union y prosperidad pa tur.
Despues di misa, e delegashon a disfruta di un evento cultural yena di sabor, ritmonan tipiko y gastronomia tradicional Colombiano. E celebracion a refleha un gran sentimento di orguyo y pertenencia.
AVP ta honra pa comparti e dia aki y ta comprometi pa sigui fortalece e lazonan di amistad y colaboracion entre nos pueblonan.
