‘Alabes, lo conta cu regulacion nobo pa proteha e tereno sagrado’ Parokia di Santa Ana ta desea di informa e comunidad local, proveedornan di benta, y tur otro socionan relevante den e industria di turismo cu entrante diahuebs, 13 di maart 2025 lo sera e area dilanti di Kapel di Alto Vista pa aproximadamente 4 te cu 5 siman. Esaki ta fungi como e di dos fase di trabounan
importante di proteccion y restauracion di e area menciona. E desaroyo aki, cu lo ser reparti den un total di 2 fase, ta uno necesario pa por continua na preserva respet y trankilidad di nos Kapel sagrado.
Durante e periodo aki, proveedornan di benta cu ta traha den e area lo wordo contacta pa suministra e informacion necesario riba e proceso completo.
Alabes, lo percura pa mantene un entrada habri na banda di e Kapel pa asina bishitantenan por sigui tin acceso na e edificio.
Regulacion Nobo pa Trafico
Pa proteha e ambiente y sonido den e area di Kapel di Alto Vista, y pa mehoracion di e experiencia di nos
huespednan, e siguiente regla lo bira aplicabel:
– UTV/ATV y Busnan no lo por pasa y ni parkeer dilanti di e Kapel mas. Cada uno lo ricibi un lugar asigna di parkeo.
– Lugar asigna di parkeo pa UTV/ATV lo ta na e parti patras di Kapel
– Lugar asigna di parkeo pa Busnan lo bira algun meter prome cu yega e Kapel
Ta di menciona cu autonan regular lo por para dilanti of patras di e Kapel.
E medidanan aki ta forma parti di un esfuerso mas grandi, pa reestablece respet y trankilidad di e Kapel di Alto Vista cu ta tereno priva di Bisdom. Asegurando cu e ta keda fungi como un lugar di pas, oracion, refleho spiritual, y preserva nos herencia cultural.
Parokia Santa Anna ta gradici e comunidad, proveedornan di benta, operadornan di tour, y tur huesped pa nan comprension y cooperacion durante e simanan binidero. Hunto, nos lo continua na honra y proteha nos Kapel di Alto Vista.
