Partido MAN-PIN ta organisa un Conferencia habri durante di cua ta profundisa riba e necesidad grandi pa establece un fundeshi solido pa construi nos barionan actual y nos barionan di futuro.
E meta principal di e conferencia ta pa introduci un modelo nobo con Corsou lo mester desaroya su barionan den futuro. MAN-PIN ta di opinion cu bario no ta “asfalt y beton” solamente. Bario ta e sitio sagrado caminda hende ta biba, pues “Bario ta directamente relaciona cu e circunstancia constante di hende”.
“Urbanismo Moderno” cu ya ta conoci practicamente rond mundo, lo ta punto di salida durante e Conferencia Internacional aki y cu esaki partido MAN-PIN ta preparando cu hopi seriedad pa dirigi Corsou riba e ruta di paisnan desaroya den caso cu pueblo duna MAN-PIN e confiansa necesario pa goberna Corsou.
E conferencia aki ta habri pa tur ciudadano cu ta interesa y cu tin e boluntad pa aporta na un ehercicio colectivo sumamente importante y necesario. Durante e conferencia expertonan tanto local como internacional lo bini na palabra hunto cu ciudadanonan y organisacionnan local cu ta activo den esfuersonan pa alsa kalidat di bida den nos barionan riba un base duradero. Pues, lo formulá un vishon skerpi con ta bay atende cu desaroyonan nobo pa cambia e manera cu ta desaroyando barionan en general.
Temanan importante cu lo haña atencion ta infrastructura, mobilidad, naturalesa y medioambiente den bario, sostenibildat den barionan nobo i moderno.
Durante di e conferencia internacional aki, lo no tin solamente intercambio di opinion, discusion pa djey regresa cas. MAN-PIN lo haci tur esfuerso pa trece algun punto di novedad cu ta encera cu durante di e conferencia lo crea e modelo cu ta enfoca riba e principio cu “Bario ta Hende” pa medio di un ‘maquette’. Tur participante presente lo por duna un aporte pa crea e modelo aki.
Cu e iniciativa aki MAN-PIN ta spera di por aporta na un esfera fresco, nobo, constructivo y moderno den nos sistema di gobernacion, caminda debidamente ta inclui habitante y organisashonnan di bario den maneho di pais, acumulando tur forsa, conocemento y experticio di relevancia.
Un yamada ta haci na un y tur pa reserva e fecha diasabra 22 di februari den WTC di 09.00 pa 14.00or pa e gran conferencia aki cu lo tin e tema “Bario ta Hende”.
Cu e conferencia aki MAN-PIN ke aporta cu un modelo nobo pa Corsou, como tal ta determina pa yuda crea un rumbo nobo den desaroyo di barionan na Corsou.
Ademas e congreso aki ta lanta animo den desaroyo di bario i nos hendenan en general.
Den transcurso di otro siman lo trece mas informacion di e Conferencia aki y tambe di e oradornan internacional y local.