MPB ta bai hasi kambio den Konseho Insular pa yuda karga e periodo di krisis ku gobernashon di Boneiru ta enfrentando ku tin impakto negativo riba Boneiru. Sr Humphrey (Juny) Wout ta retirá komo miembro di konseho insular i sr Hennyson Thielman, lider polítiko di MPB ta bai asumí responsabilidat komo miembro di Konseho Insular. Petishon di lider di frakshon di MPB por medio di un karta fechá 13 di Mart 2025 na presidente di Konseho Insular, sr John Soliano ta pa e kambi aki por tuma lugá durante e proksimo reunion publiko di Konseho Insular.
Unda ku bo bira na Boneiru bo ta tende kritiká riba Kolegio Ehekutivo te ku awor e palabra den boka di pueblo ta ku gobernashon di Boneiru ta sin direkshon, trabounan den gobiernu i na Boneiru en general ta mal pegá, ku gobiernu ta sobra mas di 30 miyon riba nan presupuesto anto pueblo ta sklama pa gobiernu drecha kayanan. No tin sufisiente kas pagabel pero gobiernu no ta saka tereno tampoko pa esun ku ke traha su mes kas. Di otro banda prijsnan di komestibel ta sigui subi ku te hasta un kai webu ta hasi dolor ora bo kumpré.
Gobiernu huntu ku konseho insular a para bira un agensia di biahe. Uniko direkshon ku e gobiernu aki tin ta direkshon pa aeropuerto. Gobiernu su prioridat ta biaha i no tin pueblo na promé luga pero ta nan mes ku nan mes ta na promé lugá. Konsiderando e krisis aktual den gobernashon lider polítiko di MPB, sr Hennyson Thielman lo bai karga responsibildat komo miembro di Konseho Insular pa yuda duna direkshon na gobernashon i desaroyo di Boneiru. Sr Thielman ta ko-fundadó
di partido MPB, e tabata konsehero pa diferente diputado, e tabata miembro di Konseho Insular i e tabata diputado na 2 okashon.
Partido MPB ta gradisí sr Humphrey Jr. Wout pa trabou i dedikashon komo miembro di konseho insular i alabes komo lider di frakshon di partido MPB pa 2 aña largu. Nos a eksperensiá ku e trabou no tabata fasil tur ora sigur komo un lider nobo den polítika, hopi traba a wòrdu pone den su kaminda i sigur komo e uniko miembro di Konseho Insular pa frakshon di MPB. Junny, danki pa e bon trabou ku bo a hasi pa pueblo Boneriano.
Juny Wout su palabranan na partido ta:
‘Nos ta un team. Mi ta keda sirbi pueblo boneriano di otro forma i na momento ku den futuro ku partido MPB bolbe hasi un apelashon riba mi persona pa asumí responsabilidat di representante di pueblo lo mi ta dispuesto pa regresá den Konseho Insular.’