Partido MPB (Movementu di Pueblo Boneriano) a tuma nota di un publikashon den medionan di komunikashon i huntu kuné tabata tin un potrèt ku a keda saka na momento di konteo di voto, kaminda hopi otro polítiko di tur partido tabata presente.
Nos por bisa ku MPB a keda yamá pa personanan riba lista di diferente partido esta PDB, UPB i M21 ku kier kòmbersá ku nos di MPB. Pero ainda mester bai sinta na mesa pa kombersá i negoshá.
Den elekshon di dia 15 mart 2023, a keda demostrá ku partido PDB ( Partido Demokrat di Bonaire) ta e partido ganadó ku 3 asiento, siguí pa partido UPB ( Union Patriótiko Boneriano) ku tambe tin 3 asiento. Pues ta bisto ku ta e dos partidonan akí, ta esnan promé yamá pa forma koalishon.
Nos partido no kier defroudá e 2034 votadó ku a depositá nan konfiansa den nos partido, tampoko e 855 personanan ku ta sostené nos lider. Esaki ta un dje motibunan ku e portanan di MPB ta keda habrí pa risibí tur hende, tambe nos ta dispuesto na hiba kòmbersashon ku tur partido ku ta rekonosé e trabou di nos partido i nos lider den e último 4 añanan i kier forma un koalishon ku Partido MPB.
Nos di MPB a forma un komishon di orientashon ku ta dispuesto na sinta na mesa ku tur partido pa skucha kiko nan tur tin di ofresé. E komishon ta konsistí di:
Renata Domacassé, Din Domacasse, Junny Wout i Mazarella Jansen.
Partido MPB ta kere ku huntu mester deliberá pa yega na un koalishon nobo pa sigui goberná Bonaire den e próksimo kuater aña. Nos di MPB ta konvensí ku tin hopi trabou ainda pa finalisá,i ku otro trabou mas di prioridat ku mester entamá.
Kualke partido interesá por tuma kontakto libremente ku sra. Renata Domacassé kende ta e persona di kontakto di partido MPB.