Tourism Corporation Bonaire (TCB) ta contento di por honra Cheky Zimmerman y Ilse DeLoyer como “Bonaire Friends” di mei y juni 2026, como muestra di apresio pa nan amabilidad, dedicacion y e impacto significativo cu nan tabatin riba bishitantenan di Boneiro.
Cheky Zimmerman a keda nombra pa Lisa Phillips di Maryland, Merca, kende a comparti un historia conmovedor tocante e lasonan special cu e y su casa a crea cu e artista local, despues cu na aña 2019 nan a top’e pa prome biaha na Boneiro. Segun Lisa, loke a cuminsa como apresio pa e obranan di arte di Cheky, a crece y bira admiracion pa e persona tras di e cuadronan. Como artista, e a descubri hopi similitud den nan storianan di bida, desde lanta na un isla y bini di un famia di piscado, te na aspiara nan pasion pa arte. Na 2025, Lisa y su casa a regresa Boneiro, dicidido pa bolbe topa cu Cheky. Durante nan bishita, Cheky y su famia a duna nan un cordial bon bini, transformando un encuentro casual di añanan pasa den un amistad significativo basa riba cariño, experencianan comparti y amor mutuo pa arte.
Ilse DeLoyer, e “Bonaire Friend” di juni, a keda nombra pa Clovis Stair pa motibo di e cuido, profesionalismo y atencion personal cu e ta brinda e sambuyadonan na Boneiro. Como divemaster, instructor y capitan di boto, Ilse ta haya elogio pa su pasenshi, entusiasmo y su capacidad pa laga cada huesped sinti su mes comodo y bon bini. Den su nominacion, nan a pone enfasis tambe riba su manera atento di ofrece ayudo ora esaki ta necesario, semper cu respet y cuido sincero, permitiendo cu huespednan di tur edad y nivel por disfruta optimalmente di nan experiencia di buceo. Su personalidad alegre y espontaneo, hunto cu su conexion sincero cu huespednan, a crea recuerdonan permanente pa famianan cu aña tras di aña ta bolbe bishita Boneiro. Den su nominacion, nan a deskribie como nan “Dive Angel” y como un hende cu a bira mas cu solamente un guia di buceo: un berdadero amiga pa bida largo.
Pa medio di e iniciativa “Bonaire Friends”, nos ta invita bishitantenan pa nombra hendenan local cu tabatin un impacto positivo riba nan estadia na Boneiro. Tur luna, TCB ta duna honor na personanan cu nan actonan, talentonan y conexionnan personal ta yuda crea experencianan inolvidabel y ta expresa e spirito real di nos isla.
“E forsa mas grandi di Boneiro ta su hendenan. Sea cu ta trata di arte, hospitalidad of simplemente amabilidad sincero, nos ‘Bonaire Friends’ ta percura pa experencianan inolvidabel cu nos bishitantenan ta keda carga den nan curazon pa hopi tempo largo despues di a bandona nos isla,” segun Elesiër Angel, director di TCB.
TCB ta felicita Cheky Zimmerman y Ilse DeLoyer cu nan reconocemento como “Bonaire Friends” pa mei y juni 2026, y ta gradici nan pa nan contribucionnan excelente na e ambiente hospitalario di Boneiro. Nan storianan ta recorda nos cu ta e hendenan di Boneiro ta esunnan cu ta haci nos destinacion uno berdaderamente inolvidabel.
