Union, perseverancia y determinacion ta loke Aruba mester awo y den e lunanan nos dilanti.
Aruba ta na un crusada caminda cu nos mester uni y mustra Hulanda y Reino Hulandes un
biaha mas cu nos por haci cosnan bon pa nos pueblo. Den pasado nos a mustra e union,
disciplina y madurez caba. Hunto nos lo vence, pero dividi nos lo cay.
Siman pasa fraccion di PPA kier a manda un peticion na presidente di Parlamento actual pa
yama un reunion di urgencia. Fraccion di PPA ainda ta warda pa haya e sosten di otro dos
miembro di parlamento riba su peticion pa yama un reunion publico. E meta ta pa cuminsa hiba
combersacionnan efectivo y haya informacion relevante di gobierno dimisionario pa den un
forma strategico y determinante Aruba negocia cu Hulanda tocante e proposicion di Ley di
Reino riba supervision financiero di Aruba yama Rijskwet Aruba Financiel Toezicht (RAFT).
Aruba, pa medio di su parlamento mester dicidi si ta firma y bay di acuerdo cu e proposicion
prome cu 1 di mei venidero. E tempo ta primi nos y nada ta pasando.
Nos por a tuma nota di e declaracion di Mike Eman (miembro di parlamento), cu ta un di e
formadonan di e proximo gabinete, cu tin un “patstelling” un impasse den e negociacionnan pa
loke ta particion di e ministerio y departamentonan. Parlamento di Aruba no mester sufri y keda
pega pa motibo di e impasse aki. Parlamento ta un organo autonomo den e trias politica
Arubano. Pues, despues di mas di un luna di eleccion y tin un parlamento nobo, mester sigui cu
e trabounan legislativo. Cada dia cu pasa ta un dia menos pa forma e Frente Nacional. Ta parse
cu Parlamento di Aruba no ta activo y mientrastanto ta un echo cu tempo ta sigui preta riba nos
ciudadanonan pa perde definitivamente nos autonomia financiero.
Sinembargo mester bisa si cu nos di PPA a tuma nota di e peticion di fraccion di MEP na
presidente di parlamento di 16 di januari 2025 pa yama un encuentro publico (openbare
bijeenkomst) pa haya un update di e negociacionnan tocante e Rijskwet Aruba Financieel
Toezicht. Den mesun peticion e fraccion ta duna di conoce cu nan a haya informacion durante
aña 2024 caba. Partido PPA pa medio di su fraccion den Parlamento di Aruba firmemente y
rotundamente ta apoya y sostene e peticion aki y humildemente kier pidi fraccion di MEP pa
haci un siguimento riba e peticion aki pasobra tempo ta bay laga nos. Di otro banda, cu e
informacion di 2024, nos ta convenci cu nos mester dal un paso mas profundo y hiba e
combersacionnan efectivo pa forma e Frente Nacional awo. No ban warda pa ora cu ta laat,
pues ora e baca hoga, pa nos mira con nos ta sac’e for di awa y rebib’e. Hamas y nunca nos
mester lubida e lucha y sacrificio cu pueblo di Aruba pa medio di e gremionan di e tempo aya y
e partidonan AVP, MEP y PPA a hiba desde siglo pasa y pa mas cu 40 aña, pa obtene un
posicion clave di Aruba den Reino Hulandes. Hamas y nunca nos mester defrauda e lucha aki
di nos mayornan.
Luna pasa Aruba a vota pa un Parlamento nobo, pues un speransa nobo, y nos mester percura
y persevera pa hunto, den union, nos yuda e isla aki sigui progresa y prospera. Awo ta e
momento pa nos por forma un Frente Nacional, entre TUR partido politico, gremio y
instancianan local pa fiha un posicion y meta comun y negocia ainda cu gobierno di Hulanda.
Awo ta e momento pa un negociacion mas husto, sin discriminacion y cu respet pa e derecho
autonomo cu Aruba tin den Reino Hulandes pa medio di “Statuut voor het Koninkrijk der
Nederlanden”. Pueblo di Aruba mester sa cu PPA cu su representacion den pueblo y como
fraccion den Parlamento di Aruba ta keda persevera y determina pa lucha pa nos logra un
Frente Nacional.