Partido RAIZ a tene su di cinco sesion di Academia di Bon Gobernacion 2025 (ABG) riba e tema ‘Social & Economic Impact’, dirigi pa economista sr. Herry Koolman, un profesional cu tin mas cu 30 aña di experencia y a cuminsa su carera na Banco Central di Aruba na 1991.
Durante e anochi, Sr. Koolman a splica e diferencia esencial entre producto interno bruto (PIB=GDP) nominal y PIB per capita, destacando cu crecemento real mester refleha den bida di pueblo y no solamente den cifra macro-economico. E la presenta tambe e paradox di crecemento obligatorio, referiendo na presion global pa crece constantemente mescos ora cu limitacion demografico y recurso natural ta pidi un modelo di crecemento mas sostenibel cu enfoke riba calidad y productividad.
Sr. Koolman a trata e banda fuerte y suave di politica fiscal, e banda fuerte ta tocante impuesto, gasto publico y direccion di inversion, y e banda suave ta relaciona riba comunicacion cla, confiansa y aceptacion publico. E la enfatisa cu economia ta basa riba realidad economico fuerte, y cu liderazgo responsabel mester mira esaki den cara cu transparencia y planificacion.
Un punto cu a haya atencion tabata e situacion serio di vivienda na Aruba. Segun Sr. Koolman, aproximadamente 60% di pueblo no por cumpra of yega na un cas actualmente, un reto cu ta crea presion social y financiero pa largo plaso. Tambe e la referi na e desafio di “bestaansminimum”, indicando cu Aruba mester mantene un nivel minimo di capasidad economico y demografico pa sostene su economia y servicio nan publico a largo plaso.
Ademas, Sr. Koolman a indica cu Aruba ta den un fase economico structural, caminda tendencia di largo plaso tin mas peso cu circulo corto. Segun e analisis aki, si no tin diversificacion y reforma proactivo, Aruba por enfrenta un caida economico rond 2027–2028, un yamada pa accion, innovacion y gobernacion proactivo for di awor.
E sesion a duna nacemento na dialogo profundo y refleho critico tocante futuro di Aruba, y a enfatisa mas cu nunca con educacion civico, integridad y decision basa riba dato ta esencial pa un pais fuerte y stabiel.
E siguiente session di ABG 2025 lo tuma lugar diahuebs 6 di november na Botica Oduber Building den Caya Betico Croes riba e tema “Good Corporate Governance”, cu invitado special Sr. Jossy Lacle. Partido RAIZ ta invita pueblo di Aruba pa join nos pa un otro session educativo, cu ta prepara lider y ciudadano pa un futuro di transparencia, integridad y bon gobernacion.
Press release: RAIZ
<img src="https://www.eanews.com/wp-content/uploads/2025/11/WhatsApp-Image-2025-11-02-at-11.55.29-AM.jpeg" alt="" width="2000" height="1331" class="alignnone size-full wp-image-283400" /