Tur hende mester di placa, tur hende kier yega na tur cos, pero ora bo amor pa placa aumenta asina tanto cu bo no tin tempo pa Dios, bo cas, y bo famia, ta un senjal di advertencia hopi peligroso, y cu ta desmostra cu amor pa placa ta domina bo bida.
Amor pa placa ta pone hende traha dos trabao, tres trabao, pasobra e competencia, ta hinca den bo cabes cu locual cu bo tin no ta suficiente, y bo kier mas di e parti financiero, y e parti humano , e responsabilidad pa famia ta cay atras drasticamente.
Laga boso karakter ta liber di amor pa placa,y sea conento cu loke boso tin,Pasobra E mes a bisa: Nunca lo Mi bandona bo y nunca lo Mi laga bo desampara.( Hebreonan 13:5).
No ta desconoci pa ningun hende cuanto hende ta laga nan yuinan nan so den cas,pa nan bay traha e di dos trabao pasobra e placa no ta yega pa e bida cu nan kier biba. Nan ta bisa nan ta duna nan yuinan tur cos, pero e tempo pa duna amor displina y coreccion ta cay cortico dia tras dia.
E mucha ta mas ocupa den su tablet y otro weganan digital, y no lubida riba e television, pa e no nota ausencia di su mayornan den cas.E mucha su mente ta ocupa den wega, y distraicion, y no tin comunion cu su mayornan.
Asina e mucha den e tempo cu mas e mester di presencia di su mayornan, ta crece su so, pasobra e necesidad di placa, a separa amor di mayor, for di e calor pa e yiu.
Ta hende mes mester pone un balans den e asunto aki, y tuma un rato y samina bo bida, y haci un pregunta kico tin mas balor, mi famia of corre tras di placa, posicion, competencia di trabao y materialismo?
Kico tin mas balor , mi matrimonio, mi famia, mi yuinan mi cuenta na banco of mi Potmonni?
No montona tesoro pa boso mes riba tera, caminda mot y frusto ta destrui nan, y caminda ladron ta kibra drenta y horta,Ma montona tesoro pa boso mes den cielo, caminda ni mot ni frusto no ta destrui nan, y caminda ladron no ta kibra drenta ni horta, pasobra caminda boso tesoro ta, eynan boso curason lo ta tambe.( Mateo 6:19-21).
No cu mi ta papia pasobra mi tin necesidad, pasobra mi a sinja di ta contento, den mi circumstancia cu mi a hanja mi aden. Mi sa di biba humilde, y mi sa di biba den prosperidad,den cualkier y den tur sircumstancia mi a sinja e secreto di ta barica yen y di pasa hamber, tanto di tin abundancia, como di pasa necesidad. Tur cos mi por den Cristo, Kende ta duna mi fortalesa.( Filipensenan 4:11-13).
Tene cuenta cu hende no tin cu haci nada ilegal of inmoral pa yega na placa.
Nos mester educa nos yuinan cu nan curpa, mester wordo respeta y cu den ningun circumstancia nan no por bende nan mes pa placa.
Sinja nan para riba nan curpa, y respeta nan mes, pa asina nan sinja conoce e amor berdadero di hende pa hende, pasobra awendia ta facil pa hende duna bo cos , haciendo manera nan ta hende bon y hende decente, caba bo ta wordo cumpra sin bo sa.
Ta un gran berdad locual e palabra di Dios ta bisa cu nos ta bibando den temponan trabahoso.
Hende a bira stimado di placer mas cu Dios.
No lubida cu placa no por reemplasa amor y presencia di Dios.
