E siklo di edukashon emansipatorio “Emansipashon” organisá pa Akademia Popular Errol Scoop a sigui su kurso. E antropólogo sosial drs. Ellen Maduro-Jeandor a trata pobresa kultural mental. Señora Maduro-Jeandor a yega na e konklushon ku un di e opstákulonan mayó ku ta stroba emansipashon berdadero di Kòrsou ta pobresa kultural mental. E ta rekomendá pa konsentrá trabounan di emansipashon riba eliminashon di e forma devastador di pobresa aki.
E historiadó i spesialista di género Drs. Jeanne Henriquez Msc a mustra ku e lucha pa emansipashon ta prioridat.
Durante e seshon aki Henriquez a trata e pregunta kua ta e fokonan di lucha di emansipashon ku Kòrsou a konosé i kiko i kon mester hasi pa kontinuá ku e lucha sagrado aki. Henriquez a hasi un yamamentu na tur esnan ku a pasa den e proseso di emansipashon pa nan sigui ku e lucha i trata mas tantu posibel pa enbolbí hóbennan den e trabou balioso di edukashon emansipatorio.
dr. René Rosalia a splika na promé lugá ken ta yu-di-Kòrsou i despues kon pa yega na e yu-di-Kòrsou nobo. Despues di kombatí e pobresa kultural mental lo yega finalmente na e yu-di-Kòrsou nobo. Un yu-di-Kòrsou orguyoso, patriótiko i polítikamente konsiente. E yu-di-Kòrsou nobo lo hiba Kòrsou na emansipashon berdadero. E yu-di-Kòrsou nobo ta práktikamente un kondishon pa por liberá Kòrsou for di gara di kolonialismo hulandes. E yu-di-Kòrsou nobo definitivamente lo para introdukshon di mas lei di konsenso na Kòrsou.
