Algun dia despues cu Corte a trata e caso di apelacion cu Ministerio Publico a entabla contra di e decision di Hues Comisario cu dos siman pasa no a bay di acuerdo pa prolonga detencion preventivo di ex Minister Otmar Oduber, ayera mainta e decision a cay.
Corte repasando tur argumento cu a wordo presenta na inicio di siman, argumentonan di Fiscal na nomber di Ministerio Publico y e defensa di abogado Vito Carlo den nomber di Otmar Oduber, ayera mainta a percura pa otro sorpresa grandi.
Segun e decision di Corte e decision di Hues Comisario pa no extende e detencion preventivo di e ex mandatario, ta wordo anula y a duna Ministerio Publico razon pa pidi y haya un extension di ocho dia mas contra di Oduber.
Sin duda esaki tabata un sla duro pa tanto e sospechoso como su abogado caminda ya nan a anuncia cu e asunto lo no keda asina y tin cu mira kico ta e opcionnan legal cu nan lo encamina den proximo dianan.
Detencion di e ex Minister no ta tuma luga mesora ya cu e tin cu wordo informa ainda di e decision di Corte pero ta un hecho cu awe diabierna 10 di juni mes e lo wordo hiba bek pa KIA pa pasa e proximo periodo di detencion preventivo.
Ministerio Publico ta gana apelacion den caso Otmar Oduber
