Segun parlamentario Dangui Oduber, esnan cu no ta stima Pais Aruba ta esnan cu ta kere den un Rijkswet. Lamentabel ta cu despues di tanto conseho ainda nos ta papia di un Rijkswet siendo cu e finansas di Aruba ta miho y Aruba semper a cumpli cu su debenan.
Segun Parlamentario Dangui Oduber “Ta hendenan cu no ta stima e pais aki, hendenan cu no tin e capacidad, cu no tin e amor pa dirigi e pais aki, pa manehe, kier un Rijkswet
E ora nos ta papia di control, e ta ironico, pasobra net e minister, Gerlien Croes, cu ta boga pa mas control, pa mas transparencia, e no kier pa parlamento controle. E no kier ta transparente. Kier meen, e dos politiconan aki, tanto Gerlien Croes como Geoffrey Wever nan ta dos walking contradiction, pasobra cada biaha nan ta contradeci nan mes. Gerlien ta bisa ‘mi kier mas control’, anto ora parlamento controle, bo ta contesta nos ‘mi no tin cuenta na duna boso’.
E esaki ta e politiconan cu nos tin awe en dia cu a bin pa practica un politica nobo segun nan, pero na e resultado di dje ta resulta un politica mas tradicional cu esnan cu nan ta considera yama politiconan tradicional.”
Minister GErlien Croes den un entrevista a vosifera cu cada voto contra HOFA ta un voto contra di fituro generacion. Segun parlamentario Dangui Oduber mi ta kere cada voto na fabor di HOFA ta un traicion pa nos historia. Ta un traicion pa esnan cu a lucha pa awe nos ta un pais liber manera nos ta.
Danki na nos Status Aparte, nos pais por a desaroya su mes economicamente, crea e oportunidadnan cu e por ta un minister di un pais awe. Pasobra si no ta pesey, e lo ta un diputado sin nada di bisa, manera ta e caso na Boneiro. Segun parlamentario Dangui Oduber e la lesa un columna na Boneiro kico e Boneriano ta pensa di e situacion cu nan ta aden, con e pobreza a crece desde cu nan a bira un municipio.
Awe esey Gerlien Croes kier pa futuro generacion? No laga bo mes wordo engaña, no laga bo mes wordo manipula, no laga bo mes wordo malinforma, pasobra HOFA no tin ningun beneficio pa e pais aki. HOFA ta un traicion pa e libertad cu nos ta gosando di dje, segun parlamentario Dangui Oduber.
Bo ta entrega bo derecho pa tuma bo propio decisionnan pa un sakito di placa. Pasobra na final di dia, libertad di un pais ta algo sagrado, y libertad di un pais no por ta mara na un prijs. Anto e dos politiconan aki, Geoffrey Wever como Gerlien Croes, kier mara libertad di nos pais pa tuma nos propio decisionnan na un sakito di placa, cual ta condenabel, repudiabel y lamentabel.”