Dialuna 9 di maart a bira, segun lider di fraccion di PPA, Eduard Pieters, un dia di decepcion despues di decisionnan tuma durante e reunion di Raad van Ministers van het Koninkrijk (RMR) na Hulanda. Segun Pieters, e proceso rond di e propuesto Ley di Reino HOFA ta sigui avansa, apesar di cu no tin consenso ni den Parlamento di Aruba ni bou di e pueblo Arubiano.
Pieters a indica cu e decisionnan tuma ta forma parti di un proceso cu, segun Pieters , ta avansando aun sabiendo cu e ley no ta disfruta di e sosten necesario na Aruba. E lider di fraccion di Partido Patriotico Arubano (PPA) a expresa su preocupacion riba e impacto cu e ley por tin riba e pais.
Segun Pieters, e situacion ta lamentabel, pasobra segun su punto di bista, e ta representa un proceso den cua decisionnan importante pa Aruba ta wordo tuma sin cu tin un amplio consenso local. E tambe a critica e rol di e coalicion di gobierno Arubaanse Volkspartij (AVP)Y Futuro, indicando cu e pasonan cu ta wordo tuma no ta refleha e deseo di gran parti di e pueblo Arubiano, sindicato , stakeholder y parlamento di Aruba.
E lider di PPA a agrega cu Parlamento di Aruba mester keda un actor central den decisionnan cu ta tocante e futuro di e pais, y cu segun dje ta importante cu e voz di e pueblo ta wordo respeta den proceso nan di e magnitud aki. Gobienro di AVP-FUTURO no ta respeta Aruba y parlamento y Hulanda tampoco no ta respeta e statuto di Pais Aruba.
