Lider di fraccion di PPA, Eduard Pieters, a haci un yamada cla pa tuma accion inmediato riba situacion di adulto mayor na Aruba, advirtiendo cu si no actua awo, e sistema por bira impagabel den futuro.
Durante reunion di IPKO, unda e tema di ouderenzorg a ocupa un puesto importante, Pieters a mustra su preocupacion riba e crecemento rapido di poblacion mayor. Segun datonan presenta pa directora di ouderenzorg, Desirée Helder, actualmente un di cada cinco habitante na Aruba tin mas cu 65 aña, mientras na Curaçao e proporcion ta 1 riba 4 persona.
Pieters a indica cu for di 2018 caba tabata conoci cu e reto di envehecemento tabata biniendo, pero despues di ocho aña ainda no tin medidanan structural concreto implementa. Segun Pieters , e plannan presenta mester wordo comparti cu pueblo pa asina Parlamento por yuda acelera nan ehecucion.
Actualmente, e gastonan anual pa cuido di adulto mayor ta ronda 100 miyon florin. Sin embargo, si no tin cambionan structural den sistema, e cifra por subi te casi 300 miyon florin pa aña, loke por pone gran presion riba finansas publico.
Fraccion di PPA ta spera cu minister di Salud Publico y Ouderenzorg bin dilanti Parlamento pa contesta preguntanan y traha hunto riba un plan di accion concreto. Segun Pieters, si no tuma decisionnan awo, dentro di 14 aña Aruba por enfrenta un crisis cu lo tin impacto serio riba famianan i sostenibilidad di pais.