Mientrastanto cu e situacion geopolitico na Medio Oriente ta sigui instabil, e consecuencianan economico ta cuminsa dal e hogar Arubiano fuertemente den su cartera. Cu un aumento pronostica den prijs di petroleo y un subida inminente den gasto di flete, e desesperacion bou di e poblacion ta creciendo, mientras cu ta reina un silencio absoluto di parti di e gobernantenan na Aruba.
Impacto di crisis internacional
Lider di fraccion di PPA Eduard Pieters ta indica cu e tensionnan entre Merca, Israel e Iran a genera un efecto domino cu ya caba ta wordo sinti den e mercado di energia. Prijs di petroleo a alcansa e barera di $100 pa bari y analistanan ta premira cu esaki por yega te na $150. Pa un isla manera Aruba, esaki no solamente ta nifica gasolin mas caro, sino tambe un aumento den costo di produccion y transporte di tur producto cu nos ta importa.
Comerciantenan local ya caba a duna di conoce cu e costo di transporte via ocean ta bay subi cu un 25%. E aumento aki den flete lo wordo traspasa directamente pa e consumidor, loke ta nifica cu e productonan den supermarket lo sigi subi di prijs semanalmente.
Aruba vs. e otro islanan den Reino
Mientras cu otro paisnan den Reino Hulandes, manera Sint Maarten y Corsou, ya a cuminsa reacciona y a presenta puntonan concreto pa enfrenta e crisis aki, na Aruba e situacion ta diferente. E falta di transparencia y e falta di un plan di mitigacion di parti di Gobierno di Aruba ta bisto.
“Aki na Aruba tin un silencio hermetico. Gobierno no a sali bisa nada tocante e crisis na Medio Oriente, ni tampoco a duna un solucion pa e avalancha di aumento cu ta biniendo,” Lider di fraccion di PPA ta indica
Exigencia pa accion inmediato
E pueblo Arubiano ta sinti cu nan ta wordo laga atras, ricibiendo “sla tras di sla” tur siman sin ningun tipo di alivio. E incertidumbre ta mandando un señal cla: mester di medidanan pa suavisa e golpi economico cu ta menasa cu e bienestar di e famianan.
Mientrastanto cu e costo di bida ta sigui subi sin un stop, e pregunta cu ta keda den aire ta: Ki tempo Gobierno lo kibra e silencio y presenta un plan pa mitiga e gasto y proteha e cartera di e ciudadano?