Diadomingo mainta, 28 di januari, a tuma luga na Bestuurskantoor e tradicional traspaso di mando simbolico na Prins y Pancho 2024 pa Aruba su Carnaval 70. Prome Minister Evelyn Wever-Croes, den su discurso dirigi na e monarcanan di Carnaval y na e publico presente, a expresa cu pa Gobierno di Aruba, e ta un placer y honor pa habri porta di e oficina di gobernacion pa ricibi nos celebridadnan di Carnaval 70.
Durante e ceremonia bunita, e monarcanan di nos Carnaval 70 a trece nan decretonan dilanti expresando nan deseonan pa tin mas union, mas atencion pa nos muchanan, mas atencion pa nos hobennan y pa Aruba uni y sostene Carnaval mas. Tambe nan tawata tin peticicionnan specifico pa diferente minister di Gabinete Wever-Croes. Prome Minister a duna di conoce cu e lo comersa cu su colega ministernan di e peticionnan aki.
“Mi ta gradici SMAC cu un biaha mas ta organisa un temporada di Carnaval hopi bunita. Aruba henter a prepara pa Carnaval 70 y mundo henter tin wowo riba nos, con nos ta celebra Carnaval. Ban duna mundo henter mas motibo p ata orguyoso di nos dushi Aruba”, Prome Minister a expresa.
Conseho di nos Prome Minister ta keda pa nos sigui cuida nos muchanan den e paradanan venidero. Preferibel ta pa no hiba muchanan hopi chikito Carnaval. Pa e muchanan mas grandi, cuida nan di solo, cuida nan oído, sea atento pa nan tin nan earplugs, duna nan suficiente cos di bebe y sigura asina cu nan lo goza di berdad di nos dushi Carnaval. Tambe, na nos adultonan, no abusa di alcohol. Ban cuida nos mes pa cada un di nos celebra un carnaval sin niun problema y keda cu bunita recuerdo di e temporada aki.
Tambe Prome Minister ta gradici tur e monarcanan di nos Carnaval cu tawata presente diadomingo mainta prome cu e apertura di gran parada di mucha na Oranjestad. Ta gradici nan mayornan, gruponan, lidernan, nos musiconan y tur esnan cu ta engrandece nos Carnaval.
“Di parti di Gobierno di Aruba, mi ta desea tur carnavalista y Aruba henter, un dushi Carnaval 70. Ban goza di nos carnaval responsable y sanamente. Mi ta spera cu na final di e temporada di Carnaval, Aruba di verdad ta demostra mundo henter ki bunita nos ta celebra Aruba su Carnaval 70”, Prome Minister a expresa.
Prome Minister a entrega na nos prins y pancho infantil e spada simbolico pa nan proteha nos carnaval di mucha. Prins y pancho hubenil a ricibi spada simbolico pa nan defende nos hobennan den carnaval. Y nos prins y pancho grandi tradicionalmente a ricibi e yabi cu ta simbolisa cu nan tin tur mi sosten y confiansa pa habri y guia nos carnaval 70. Na prins y pancho clssico, Prome Minister a entrega un yabi di ‘spare’ pa por si acaso e prins y pancho grandi jump dimas y perde nan yabi. Tambe, cada monarca como miembronan di organizacion SMAC a ricibi un pin for di Prome Minister.
