BBO na frontera ta causa menos inflacion
“Comunidad tambe por yuda controla prijs di producto haciendo uzo di e App di Control di Prijs, E poder di compra ta den bo man”
Prome Minister Evelyn Wever-Croes, durante durante conferencia di prensa di Gobierno diaranson mainta, hunto cu Directora di DIMP, señora Luenne Gomez-Pieters a splica e motibo cu mester a tuma e decision pa introduci BBO na frontera. Esaki, Prome Minister a duna di conoce, ta pasobra Aruba tin e debe pa paga y mester genera entradanan pa paga e debenan di nos pais. Den e caso aki, a scoge e entrada cu ta causa menos inflacion, cu den e caso aki, ta e BBO na frontera. Esaki, tanto Prome Minister y Directora di DIMP a indica, cu ta algo cu gremionan na Aruba mes a indica y propone.
Tin hopi critica cu cosnan ta hopi caro na Aruba. Aruba ta importa tur cos, cu esaki, lamentabelmente, Aruba ta importa tambe e inflacion di otro pais. Momento cu nos importa fruta y berdura for di otro pais, nos ta importa nan infacion tambe. No obstante, e inflacion na Aruba ta mas abou compara cu otro pais den region. Esaki ta pasobra Gobierno di Aruba a tuma desicionnan pa mantene e inflacion mas abou.
Prome Minister a indica cu pa baha e inflacion mas, Gobierno a tuma otro pasonan entre otro entrante dialuna, Aruba ta importa fruta, berdura y otro productonan for di Venezuela. E idea ta tambe pa haya material di construccion tambe for di Venezuela di bon calidad y na prijsnan mas abou y ta bira mas barata ainda cu e invoerrechten cu ta baha.
Minister di Energia, Glenbert Croes ta trahando pa baha e tarifa di awa y coriente y busca gasoline na prijs mas barata cu ta yuda pa baha inflacion. Minister di Economia, Geoffrey Wever tumando pasonan pa percura cu tin mas control pa asina Evita e abusonan cu sa tuma luga cu prijsnan.
Bisando esaki, Prome Minister ta encurasha comunidad di Aruba pa haci su parti tambe den controla supermercadonan. Ya desde Gabinete Wever-Croes I, Departamento Asunto Economico, Deaci, a introduci un App di Control di Prijs cu ta disponibel pa Iphone y Androids. Den e App ta wordo publica e macuto di compras. Nan ta subi caya regularmente y bishita supermercadonan pa controla prijsnan y ta publica unda por haya e prijsnan di mas barata riba nos isla.
“E poder di compra ta den bo man. Haci uzo di e App, y compara prijsnan prome cu bo cumpra cualkier product. Aruba ta den pleno recuperacion. E bon noticia aki nos por a scucha tambe for di IMF dialuna ultimo cu a confirma cu tur loke Gobierno ta haciendo ta hibando nos pais padilanti”, Prome Minister Evelyn Wever-Croes a enfatisa.