Prome Minister Mike Eman a reuni oficialmente cu representantenan di Universidad di Wageningen, Aruba Conservation Foundation y Departamento di Naturalesa y Medioambiente (DNM), pa ricibi e rapport strategico “Aruba 2050 Proyect”. E estudio ta fruto di un colaboracion estrecho entre Universidad di Wageningen y Aruba Conservation Foundation, cu meta pa defini un vision sostenibel y duradero pa naturalesa di Aruba.
Gobierno di Aruba, bao liderazgo di Prome Minister Eman, ta pone naturalesa como un prioridad den e agenda nacional. Pesey naturalesa ta resorta directamente bao di Ministerio di Asunto General, pa garantisa un cohecion efectivo den maneho gubernamental y pa evita decisionnan cu por contradici e enfoke ecologico.
E “Aruba 2050 Proyect” ta un documento den cual ta defini e maneho pa reforestacion, restauracion ecologico y maneho sostenible di e recurso natural di Aruba. E rapport ta inclui solucion concreto, por ehempel un miho manera pa recolecta awa, implementacion di regenbak, maneho structural di rooi, y canalisacion di awa di jobida pa yega na e areanan cu tin potencial pa vegetacion. E reforestacion lo bira un proyecto nacional, cu e participacion di DNM, Universidad di Wageningen y tur ciudadano.
Urbanisacion y desaroyo acelera a percura pa Aruba a perde mas cu 70% di su vegetacion y Gabinete AVP-Futuro tin e compromiso pa trece gran parti di e vegetacion aki bek.
E proyecto ta inclui un fase di “nursing” – cria matanan for di simiyanan local, pa despues replanta esakinan den areanan strategico. Esaki ta netamente locual Prome Minister a inicia algun siman atras na saliña di Franse Pas, caminda hunto cu boluntarionan y Aruba Conservation Foundation, a planta un cantidad di Mangel Blanco y Fofoti. E meta final: un Aruba berde, vibrante, cu vegetacion autoctono den cada bario, restaurando nos identidad natural.
E meta ta ambicioso, pero realisabel, y ta forma parti integral di e “Green Vision” di Gobierno. Cu e apoyo tecnico y experticio di Universidad di Wageningen, Aruba ta pone su base pa un futuro mas sostenibel, y un naturalesa protegi cu orguyo.
