Presidente di sindicato FTA, Jose Figaroa, a expresa su satisfaccion cu e manifestacion pasivo cu a tuma luga durante bishita di Rey Willem-Alexander na Aruba. Segun Figaroa, aunke no a tin un participacion masivo, e cantidad di manifestantenan a resulta suficiente pa transmiti e mensahe cu nan tabata kier manda.
Figaroa a mustra cu e meta principal di e accion a wordo logra: haci e voz di sindicatonan yega na Hulanda. Sinembargo, el a enfatisa cu e mensahe no tabata dirigi unicamente na Hulanda, sino tambe na Parlamento y Gobierno di Aruba.
Segun e presidente di FTA, e manifestacion a representa un paso importante den e lucha pa haci e preocupacionnan di trahadonan wordo tende, tanto na nivel internacional como local.