E International Panel on Deltas and Coastal Areas (IPDC), na nomber di su organizacionnan asociado, a anuncia awe e publicacion di raportnan di scenario climatico pa Aruba, Curaçao y Sint Maarten den idiomanan local. E raportnan ta basa riba e publicacion na idioma Ingles cu a wordo publica na december 2025 y awor ta disponibel na Papiamento (Aruba), Papiamentu (Curaçao) y Hulandes. E publicacion ta resultado di un colaboracion unico entre e servicionan meteorologico nacional di Aruba, Curaçao, Sint Maarten y Hulanda.
Introduccion di Scenarionan Climatico pa Aruba, Curaçao y Sint Maarten
E scenarionan climatico ta forma parti di e proyecto mas resien di IPDC den Caribe Hulandes, enfoca riba scenarionan climatico y servicionan digital di informacion climatologico. Basa riba datonan cientifico, e scenarionan a wordo desaroya pa e añanan 2050 y 2100. Nan ta destina pa sostene e diseño di medidanan di adaptacion na cambio climatico y e desaroyo di plannan nacional di adaptacion climatico.
E scenarionan climatico ta mustra con variabelnan importante di clima por cambia, incluyendo temperatura, velocidad di biento, precipitacion y nivel di lama. Usandomodelonan global di clima y observacionnan historico local, e scenarionan a wordo adapta especificamente na e circumstancianan geografico y climatologico unico di Aruba, Curaçao y Sint Maarten.
Den e ultimo decadenan, temperatura promedio mundial a subi como resultado di un aumento den emision di gasnan cu ta causa efecto invernadero. E cambionan aki ta afecta bida di hende rond mundo, incluyendo habitantenan di islanan chikito manera Aruba, Curaçao y Sint Maarten. Pa e motibo ey, ta esencial pa compronde con clima por sigui cambia durante e resto di e siglo aki, pa por tuma decisionnan informa y haci planificacion pa largo plazo.
Introduccion di un tool digital pa uso facil riba e Climate Impact Atlas
Ademas di e raportnan nobo, IPDC ta anuncia e lanzamiento di un tool digital nobo di scenario climatico riba Climate Impact Atlas di Aruba, Curaçao y Sint Maarten. E tool interactivo y facil di usa aki ta permiti usuarionan explora e scenarionan climatico y nan implicacionnan di un forma sencillo.
Usuarionan por selecta un horizonte di tempo (2050 of 2100) y un variabel di clima (temperatura, precipitacion, biento of nivel di lama) pa mira e proyeccionnan relevante. E resultadonan cu ta wordo presenta den e tool ta completamente consistente cu e raportnan di scenario climatico pa Aruba, Curaçao y Sint Maarten.
E tool ta disponibel den tur idioma local, loke ta hacie particularmente valioso pa uso educativo, informacion publico y involucracion di diferente grupo di interes.
Pa Mas Informacion
E raportnan di scenario climatico recientemente traduci por wordo download for di e siguiente website-nan di partner: