Tourism Corporation Bonaire (TCB) a duna rekonosementu na dies bishitante komo embahador di Boneiru durante luna di ougùstùs.
E programa “Bonaire Ambassador Program” ku a keda introdusí na aña 2001, den su trayektoria di 25 aña ta hopi gustá serka nos wéspetnan. Na luna di ougùstùs, dies bishitante a risibí nan rekonosementu komo embahador di Boneiru den kategoria di bròns, plata i oro.
Den kategoria di bròns a honra sr. John Fava di Merka ku ta bishitando Boneiru pa 10 aña konsekutivo. “Boneiru ta un isla enkantador, ku su sitionan pa sambuya, su hendenan amabel i spesialmente e áreanan kaminda bo por opservá bunita bahada di solo,” tabata ekspreshon di sr. Fava.
Den kategoria di plata a duna rekonosementu na Claude Tritz i Michelle Schanck di Luxemburg ku ta bishitando Boneiru pa 15 aña. Pa e pareha akí e lema “Once a visitor, always a friend” ta vigente. Nan ta sumamente enkantá ku nos isla entre otro pa motibu di e kaluroso bon biní ku nan ta haña kada biaha i e amabilidat di Boneiru su habitantenan.
Enrique Villar prosedente di Merka a haña rekonosementu pa su 16 aña di bishita na Boneiru. Su ekspreshon tabata: “Mi ta gusta tur kos di Boneiru!” Patricia O’Donnell tambe a keda honrá pa su 17 aña di bishita na Boneiru.
Richard Blankfein, Lucille Kowisz, Rita Courtney konhuntamente ku John i Melanie Ferrari for di Merka a risibí nan rekonosementu pa nan di 20, 24 i 25 aña di bishita na Boneiru.
