Ki bunita, y ki dushi ta pa topa nos dushi hendenan local crioyo, nechi y elegante, nos dushi hendenan humilde pero orguyoso y gradicido na Bon Dios pa nan bida y nan bunita famia. Tawata Diasabra anochi ora cu mi casa cu mi a caba di come den Wendys, saliendo nos a wak un bunita famia sinta na mesa ta corta un super dushi bolo “Torta real”, esun cu Lady Ruth ta gusta masha masha hopi mes ! Lady Ruth no sa traha bolo, pero ta gusta come bolo si ! Oh ki bunita bolo dorna cu su dusi pruim cu su layersnan di dushi puding den dje ! Nos baba a cuminsa lek !!
Un crenchi mas tempran, nan tambe tawata sinta ta come nan Wendys dushi asina ! Nan tawata nos bisinja den Wendys. Lady Ruth a lanta bay busca e dos frostynan pe y pa su casa y no a ripara cu “nos bisinja den Wendys” tawatatin un bolo. Manera ta su custumber, palabranan a sali fei su boca :” Esta un dushi bolo ! Home made ! Ta ken a hasi anja ?” pa e bunita sra sinta na mesa contesta y mustra riba e gentil y guapo cabayero cu petchie bisti ! Mesora nos a felicita e guapo cabayero bisti cu su petchi, para banda di algun miembro hoben di nan famia, algun hobencita hopi cute y masha bunita mes ! Na e mesun momento nan a puntra nos si nos tawata kier un pida bolo, cu naturalmente Lady Ruth no a nenga ! Nos a hanja dos pida, un pa Johan y un pa mi, nechi bunita riba un scotter lora den pida foil. Mi curason a sinti un bula di emocion di amor, gradicimento y alegria pa e dushi hendenan aki. Cu Dios sigui drama su bendicion di salud, paz, trankilidad, alegria y hopi hopi mas forsa, abundancia y sabiduria riba e dushi y bunita famia aki. Nos no a puntra nomber, pasobra, nos ta lubida si nos no skirbie un caminda, pero ya cu nos mester a bay cumpli cu un otro compromiso, nos a pidi si nan permiso pa a saca un potret di nan pa pone den nos relato. ( Lady Ruth ta corda mayoria bes e bunita caranan y bunita curasonnan y no e nombernan asina lihe). Importante pa nos ta, cu nos a comparti algun rato dushi asina cu un bunita famia. Danki na e dushi hendenan aki, pa a hasi nos Diasabra anochi mas special, pasobra, ta e momentonan aki ta “Bida pa Ruthy”, ta e momentonan aki ta “Amor pa prohimo pa Ruthy”. Mesora ora nos a yega cas, Lady Ruth a come su pida bolo torta real duuuushiiii ! Y a pidi su casa Johan saca un pic cu Ruthy saboreando e bolo ! Un biaha mas, Meneer, pabien y hopi anja mas di salud y bendicion !Y masha masha masha danki pa e dushi pida bolo !!! Duna di curason y accepta di curason !! Nos ta conclui nos relato cu un poema chikito dedica na nos sub campeonnan den little league baseball internacional :
Deporte ta uni, deporte ta sano,
Un bon caminda yen di positivismo di bo y di mi
Ningun experiencia y les ta en bano
Boso a resalta y conkista
Boso ta nos hereonan admira
Boso ta stima boso mes cu talento
Aruba ta bendiciona y super contento!
Cu amor pa cada un di nos muchanan
Pa cada un di nan coach y lidernan
Pa cada swing, catch, hit y homerun
logra den cada wega cu “serious fun”
Boso ta nos orguyonan ayera awe y mayan !
Entre cadushi solo y laman, awe nos tur ta bati man
Cu nos grito di alegria pa nos dushi Aruba tur dia !
TEAM ARUBA LITTLE LEAGUE BASEBALL PABIEN !!!!
Un “bearhug” di Lady Ruth !
Y danki pa lesa nos columna di e siman aki cu hopi atencion y curason !
