Diasabra mainta pa 6:07 central di polis ta wordo informa di un caso cu a tuma luga dilanti un cas na Coba Lodo y cu lo a scucha tironan. E prome informe ta cu lo tin un hende homber band’i caminda cu no ta reacciona. Central di Polis ta despacha patruya y ambulance cu maximo urgencia na e sitio.
Na yegada polis ta topa enberdad cu un hende homber band’i caminda na suela y no tabata reacciona. Ambulance ta yega na e sitio pero lamentablemente no por a haci nada mas pa e victima. Segun informacion ta trata aki di un caso di asesinato. Prome cu e acto a tuma luga tabatin ya caba problema entre e primonan. Polis a detene Gilbert Paesch pa interogacion , pasobra tin basta indicacion cu e sospechoso principal probablemente lo ta Israel Paesch. Te ainda no a yega na detene Israel Paesch, pero ta spera cu e mes lo por bin entrega su mes na warda di polis. Sinembargo e investigacion ta andando ainda pa por bisa y duna indicacion kico exactamente por a sosode.
Polis tecnico, recherche, fiscal, departamento di slachtofferhulp como tambe dr.Forensico a presenta na e sitio. Dr. Voskuil ta constata morto di e victima e hende homber Rene J. Paesch naci na Aruba 30 december 1990 (34 aña).
E curpa a wordo tuma den beslag y e investigacion ta den man di recherchenan pa sa kico exactamente a sosode. T’e cu awor no por bisa dor di kico e victima a fayece y investigacion lo mester saca afo esaki.
Tambe na e sitio a detene un hende homber relaciona cu e caso aki. Tambe un auto y un brommer a wordo confisca y hiba warda di polis pa mas investigacion. Cuerpo Policial ta haci un apelacion si abo a wak of sa algo pa yama e tiplijn di polis cu ta 11141.
Bo ta keda anonimo.
Cuerpo Policial Aruba ta manda palabra di condolencia na famia di e fayecido.