Un bon dia yen di alegria, un bon dia yen di sabiduria den nos alegria ! Cu hopi bendicion di Tata Dios cada dia cu su oportunidadnan nobo pa nos tur, cu salud y gradicimento.
E dia grandi pa Lady Ari ya a pasa, ya ta trai lomba, pero tur e buniteza di e dia ey si no lo pasa. E dushi atardecer aki ta bibo den cada curason y alma cu tawata presente.
Ta momentonan precioso inolvidabel, cu Ari a briya manera un strea. El a shine !!!!
Nos ta papiando di mi bunita amiga colega escritor y Poeta Ariana M. Koolman Chirino cu su nomber artistico” Lady Ari”. Recientemente Lady Ari a presenta su prome buki di Poesia “Mi bahul di poema” na Biblioteca Nacional cu un sala completamente yen di su famia-, amigo-y coleganan escritor y Poeta. Lady Ruth no por tawatatey pa motibonan familiar, nos tawatatey den mente alma y curason, y por a lesa hopi cos bunita riba facebook di e exitoso atardecer aki, cu dushi musica di guitara di Chris Kross .Ya ta hopi anja cu Ariana ta skirbi y recita poema pa hopi occasion y ta hasi esaki di curazon. E ta un artista multifacetico y hopi inspira. E ta un di nos prinsesnan indjan ilumina. Orguyoso di su antepasadonan cu sanger indjan. Un hende muhe halto di estatura, elegante y firme den su sapato. Un artista cu nunca ta sinta keto. Un amiga, ruman scout cu bo por conta riba dje. Ki alegria a reina riba su dushi dia di presentacion di su buki, ki alegria den e mundo literario cu awor tin mas buki na nos idioma Papiamento. Mas poema pa inspira di nan. Nos a bestel un bunita arreglo di flor pa Lady Ari, pero despues a hanja sa cu e floresteria a hasi un fout den e fecha ora cu no a entrega e flor, locual Lady Ruth a lamenta masha hopi mes, pasobra ela bestel e flor tempran, algun dia prome, menciona esaki den su poema cortico dedica na Ariana, bunita recita pa Olga Buckley, y a pidi Ariana pa laga nos sa cu ela ricibi e flor. Lamentablemente ni un disculpa chikito profesional di parti di e floresteria en cuestion na Lady Ari, pero ta cosnan cu por pasa. (Vicky a pidi Lady Ruth sorry, pero ta na Lady Ari nan mester a apologize, segun nos curason, toch ? Na e adres BNA y nomber di entrega dia 26 di April ) . Pero esaki no a danja e dia ni e dushi ambiente na BNA. Nos por a sigui otro bon noticianan di e gran escritor aki, Ariana,den nos corantnan local y tambe riba fb cu por a scucha Ari recita bunita poemanan pa cu Dia di Mama na varios di nos radio emisoranan local promoviendo su bunita buki. Su precioso joya di buki “Mi bahul di poema” a bay te Orlando, Merca den un di e librerianan, segun nos a lesa riba facebook, den e vecindario na unda tin Arubianonan ta biba y of studia, kemen ya su buki a cuminsa crusa frontera den mas lus. Diasabra dia 7 di Mei ultimo Lady Ari tawata na Plaza Bookshop ta firma su bukinan pa esnan cu a bay pa cumpra. Nan ta bay manera pan cayente ! Nos ta sigur cu nos lo disfruta di su poemanan durante un di e” Poetry Nights”nan na caminda. Ta cos bon y bunita tin den “Mi bahul di poema” di Ariana M. Koolman Chirino “Lady Ari”. Cosnan real di bida. Cosnan cu ta toka bo curason y inspira’bo. Pone’bo sinti, pone’bo pensa, pone’bo biba ! Pone’bo stima bo mes, nos naturalesa y nos isla mas !
Pabien lieve Ariana, hopi pero hopi exito cu bo prome buki y cu mas lo sigui ! Manera mi ta gusta bisa :” You are the blessing “! Sigui briya, sigui skirbi, sigui expresa y inspira ! Cu nos Creador di amor y talento, di paz y alegria, di gradicimento y sabiduria sigui bendiciona’bo y nos tur awe y semper, manera Padu Lampe awe den felis memoria ta bisa semper, y mas ainda cu e presentacion di bo buki tawata riba e fecha natal di Padu, esta, dia 26 di April. Danki pa comparti di bo amor den bo talentonan cu tur rond di bo. Danki na tur pa lesa nos relato di awe, sigui cuida curpa, stay safe, y un “Bearhug” extra grandi diki y gordo pa nos lectornan!
Danki na redaccion di nos corantnan local pa publicacion di e relato aki cu algun picsnan bunita pa companje. Love you too !!!