Ya nos a despedi di dje y bisa ayo y te despues na nos bon amigo locutor profesional cu curason
grandi . E ta den mi curason ainda, e bunita atardi ey cu speechnan bunita di e.o. Erin Croes di
Magic FM , Pastor Marcel Balootje, Victor Pietersz y Mimi Koolman y boso amiga y sirbidora
Ruthy “Lady Ruth” a recita un bunita poema prosa na comienzo di e atardi tristo aki, pero
accepta pa tur, pasobra Dios ta duna, Dios ta tuma. Hopi coleganan den e mundo di radio
difusion a bin despedi di Johnny Habibe, the Anchorman di Megga 88 y Hit 94 FM. Aruba a
perde un di e mihor bosnan na radio. Awor su yuinan ta hasiendo tur lo posibel pa sigui den e
pasonan exitoso di nan tata den e ramo aki di radio difusion. Un reto grandi sigur pero no
imposibel cu e curason na e bon lugar. Nos a sigui nos curason pa comparti e poema prosa den
nos relato di awe. Mientras hopi ya ta den e dushi ambiente di carnaval su actividadnan, tin
famianan tristo cu perdida di un ser keri. Nos condolencia, consuelo y amor na tur e famianan
aki. Palabranan hopi usa di e poeta lady Ruth ta, cu, nos tur tin cu bay un dia…
Mientras nos ta aki na mundo rondona pa e fisico y material, nos lo sigui hasi nos best den tur
cos dia pa dia, segun e boluntad di nos Creasor di amor. Ata aki e poema prosa dedica na felis
memoria di mi gran amigo locutor y presentador John Alex”Johnny”Habibe RIP.
Danki pa e atencion di curason na nos relato di awe. Un bon dia yen di sabiduria den nos alegria.
JOHNNY CU FE DEN SU BUNITA CURASON…
Aruba den shock cu cambio di anja 2024 pa 2025
Wowonan a lesa riba facebook
Curason y alma cu tristeza di warwaru
No por a yora, silencio cu hopi pregunta sin contesta
Un smile, Johnny a biba bon na paz cu tur
A bay nos dilanti un crenchi tempran,
Aya riba lo sigui cu mas bunita y bon trabao
Bon amigo, colega locutor, colega den medionan di comunicacion
Donjo y director di exitoso Mega 88 y Hit 94 FM
Su team di locutor y presentador, Julissa su man drechi den oficina
Patrosinadornan y comerciantenan , fiel oyentenan den tur skina
Su noticiero y programa Johnny’s Goldies bon scucha
Johnny su curason na e bon lugar
Yen di fe y gradicimento pa su Yaweh
Un mente, alma y curason bunita di un genio a uni nos awe
John Alex Habibe cu estudionan, cursonan, trabaonan y logronan incomparabel
Guapo, unico y profeshonal hopi sabi a sinya su mes tur cos den e mundo di radiodifusion
Nos a lesa di esakinan, skirbi pa Roberto G. Croes, den “Nos historia Nos herencia”
Nos a tende di esakinan den e programa Voices and Choices cu Marisol Tromp
A Nos a combersa cu Johnny regularmente den dushi ambiente di paz
Ora nos bishitele pa papia di cosnan social cultural den su noticiero
A comparti di curason pa curason, di nos fe, di nos amor pa Creador di Universo
Su bos fuerte caluroso y unico lo keda graba den nos cu su mirada profundo
Su seriedad y su chistenan, su elogionan, respet y aprecio cu ela merece aki na mundo
No ta iguala locual ta spere ayanan den Reino Celestial
Un cabayero, un bon hende, un dushi hende a bay laga nos
Awor, uni den e eterno amor, splendor y luz di Dios
E ser humano precioso den Johnny a inspira nos tur,
Como hende, tambe a faya aki aya y por a hasi algun cos diferente,
Pero a sigui stima tur su sernan keri y tawata orguyoso di nan y di tur fiel oyente
Cu respet y amor di YAWEH pa tur prohimo ruman
Johnny su fe fuerte y fiel den su respet y amor pa YAWEH , grandi y ehemplar
Sigui bo rumbo lieve Johnny, meymey di e streanan como un strea cu tono celestial
Johnny Habibe, The Anchorman, cu bunita aprecio di amistad pa Ruthy Bergen Vrieswijk
Un amistad sincero y directo den luz infinito, di alma pa alma , hopi special
Danki pa tur locual bo a hasi pa alegra nos curason cu bo talentonan duna na Aruba,
Awor den tur libertad den Cas Musical Celestial di bo YAWEH sin duda
Ruthy”Lady Ruth” Vrieswijk-Bergen.
(Aruba, Januari 6 , 2025)
