Aruba ta enfrenta un momento crucial den su desaroyo social, cultural y politico. Actualmente, aproximadamente 60 porciento di e poblacion ta Arubiano naci na Aruba, mientras 40 porciento ta inmigrantenan cu a scoge Aruba como nan hogar nobo, algun cu a drenta respetando nos leynan y cana e caminda corecto , pero algun cu a drenta ilegal trapa riba ley di e pais pero cu e haya un despensacion di gobienro di AVP-FUTURO di pasa di ilegal pa bira legal. E dato aki no ta un problema den su mes, pero si ta plantea un reto importante pa preserva identidad y cohesion social di Aruba.
E real preocupacion ta cu Aruba mester fortalece su esfuerso pa educa y informa inmigrantenan riba historia, cultura y balornan fundamental di e pais. Sin un proceso di integracion consciente y structura, tin e riesgo cu Aruba su identidad cultural ta wordo diluí, transformando e isla den algo cu no ta coresponde cu e “Dushi Aruba” cu nos tur kier conserva. Integracion no ta asimilacion, pero si mester tin respet pa e cultura y tradicionnan di Aruba.
Den e contexto aki, ex lider di MEP, Nelson Oduber, a haci un yamando pa un campaña di conscientisacion riba “kico ta Aruba”. Segun Oduber, esaki no solamente ta aplica pa inmigrantenan, pero tambe pa Hulanda, considerando cu Aruba ta parti di Reino Hulandes.
Un punto di preocupacion grave ta cu Aruba actualmente no tin un Minister Plenipotenciario na Hulanda. E ausencia aki ta crea dificultadnan pa studiantenan y ciudadanonan Arubiano na Hulanda, cu regularmente ta confronta discriminacion y trato desigual, apesar di tin un paspoort Hulandes. Hopi Arubianonan ta sinti cu nan ta wordo trata como “stranhero” den un Reino unda nan oficialmente ta parti di dje.
E posicion di Minister Plenipotenciario ta esencial pa defende interesnan di Aruba y asegura un relacion respetuoso y balancea cu Hulanda. Sinembargo, segun Nelson Oduber, e actual gobierno no ta demostra liderazgo efectivo den e ambito aki. El a critica Minister Gerlien Croes pa falta di claridad y vision riba relacion entre Aruba y Reino Hulandes.
Tambe tin crítica riba inmadurez política den e actual gobierno. Oduber a menciona cu algun hoben politico, manera Wendrick Cecilia, ta haci declaracionnan sin analisis profundo, particularmente riba futuro di turismo di Aruba. Si criminalidad y vandalismo sigui aumenta, Aruba por perde su reputacion como destino seguro y trankilo un factor clave pa su economia.