For di varios luna caba Departamento di Agricultura, Cria y Pesca Santa Rosa a planea un campaña di concientisacion riba seguridad di cuminda. Mundialmente hopi ta wordo hasi pa loke ta seguridad di cuminda. Esaki ta pa e individuo por cuminsa pensa pa planta su propio alimento pa e por difruta di esaki. Logicamente esaki ta yuda economia tambe. Baha un poco pa loke ta nos importacion. Cumpra mas localmente maner cu semper Santa Rosa a bin ta promove y concientisa. Unda cu Santa Rosa por a hasi un of otro presentacion semper nos ta encurasha mas pa nos hendenan por planta mas pa nan por mas saludabel tambe. Esaki ta e idea principal di nos campaña di concientisacion. Y no tabata tin mas mihor dia cu ta Dia di Tera pa lasna e tremendo campaña di concientisacion aki.
Pa duna mas empuhe na nos campaña di concientisacion riba seguridad di cuminda nos a aserca algun productor exitoso di Aruba pa forma parti di e commercialnan. E productornan exitoso aki ta den persona di e hoben Garvin Ras di Cocolishi Green, Darrel Koolman di Koolman Family Farm y sr. Aldrich Croes un personahe bon conoci den e mundo di media aki na Aruba y tin un pasion enorme pa cultiva su productonan pa propio consumo.
E produccion di e commercialnan aki tabata den man di Telearuba NV hunto cu Randy Maduro. A realisa tres tipo di commercial, cu tres diferente contenido y tres diferente mensahe.
Na e ocacion di lansamento di e campaña tabata presente sr. Ursell Arends minister di Transporte, Integridad, Naturalesa y Asuntonan di Adulto Mayor y di cual Sector Primario ta resorta, sra Nathalie Maduro director di Departamento di Agricultura, Cria y Pesca, y sra. Zulema Dabian-Erasmus di Departamento di Economia kende a traha cu lasonan estrecho di cooperacion pa realisascion di e campaña aki.
E commercialnan aki ya caba ta pasando na nos planta nacional di television Telearuba NV y tambe lo bai scucha esakinan na mayoria Radio Stacion local.
Un palabra di gratitud na Minister sr. Ursell Arends kende tabata presente na e ocacion aki. Na sra. Zulema Dabian-Erasmus di Departamento di Economia pa e tremendo cooperacion. Telearuba NV pa un tremendo produccion di e tres commercial nan aki. Sin laga afoun danki grandi na Garvin Ras di Cocolishi Green, Darrel Koolman di Koolman Family Farm y sr. Aldrich Croes pa nan aporte na realisacion di e campaña di concientisacion aki.
