Den cuadro di e movecion global ‘Good Deeds Day’, Scouting Aruba a encabesa un bunita iniciativa caminda hubentud y adultonan a uni forsa pa brinda atencion y amor na e generacion grandi den nos comunidad.
Pa e ocasion special aki, Scouting Aruba a traha estrechamente hunto cu Parlamento Hubenil, Poder di Hubentud y Fundacion Believe in Yourself. E obhetivo principal tabata pa hiba un gesto di aprecio pa e residentenan di e casnan di cuido na nos isla, combinando donacion di comestibel cu locual ta mas valioso: tempo y compania.
Interaccion personal y profundo
Bou liderasgo di HKC Adelin Trimon-Geerman y cu sosten di HC Dave Martinus hunto cu e hoofdbestuur di Scouting Aruba, a opta pa un strategia structural. En bes di bishita cu gruponan grandi, a scohe pa delegacionnan chikito. E decision aki a wordo tuma pa garantisa un ambiente trankil pa e adultonan mayor, permitiendo un interaccion mas personal y profundo entre e hobennan y e residentenan.
Durante e bishitanan, a keda demostrá cu e balor di mas grandi no tabata e productonan entrega, sino e oportunidad pa “bridge e gap” generacional. E bishita y e combersacionnan a habri porta pa e hobennan siña balora e esfuerso di esnan cu a traha pa desaroyo di nos pais.
Gratitud y compromiso
E actividad a conclui cu un ceremonia ameno bao di sombra di palo, caminda a gradici tur boluntario, chauffeur y personanan cu a contribui. E participantenan a comparti nan experiencianan emocional y a ricibi un certificado di participacion hunto cu un ‘goodie bag’ como aprecio pa nan trabou boluntario.
Scouting Aruba a enfatisa cu un proyecto di e magnitud aki solamente ta posibel cu sosten di e sector comercial. Nan a extende un palabra di danki special na: Ecotech, Martijn Trading, Romar Trading, Subway, Oduber Agencies, Caribbean Print Center, Satex, El Louvre, Windcreek Hotel, Divi & Tamarijn All Inclusive Hotel, Tec NV, La Moderna, Costa Linda y e trahadornan di Costa Linda Hotel pa nan contribucion generoso.
Movecion global
Good Deeds Day ta un iniciativa cu ta wordo celebra den mas di 110 pais rond mundo, unda miyones di boluntario ta mobilisa pa haci bon den nan comunidad. Scouting Aruba, fungiendo como e motor di e iniciativa aki na Aruba, ta invita comunidad caba pa prepara pa e siguiente edicion.
Otro aña, Good Deeds Day 2027 lo tuma lugar dia 18 di april, caminda ta spera di por sigui crece e impacto positivo aki riba nos isla.
