Durante un bishita recien, un representante di e sector di cunukeronan a expresa su profundo preocupacion pa e falta di balansa entre e proteccion di mascotanan y e sosten na e sector primario di Aruba. Cu un yamada fuerte na autoridadnan y comunidad, Jair Britten Presidente di pro cunukeronan Aubiano a pidi pa mas respet pa e leynan existente y pa e imagen di e isla den celebracion di 40 aña di Status Aparte.
Un reto pa e sector primario
E cunukero, kende a describi su mes como un persona “cla y raspa” cu kier trece e berdad dilanti, a cuestiona e prioridadnan actual di e pais. Mientras cu tin hopi sosten pa fundacionnan cu ta dedica na cacho y pushi, e ta sinti cu e productornan local den e sector primario ta wordo laga un banda. “Nos no ta contra cacho y pushi, pero unda nos sector primario a keda?” e orador a puntra, indicando cu e situacion actual ta zona pisa pero ta un realidad cu mester wordo atendi.
Impacto social y turistico
Segun e declaracion di Presidente di pro cunukeronan Aubiano, e cantidad di animalnan riba caya no ta solamente un problema social, sino tambe un peliger pa deporte y un mancha pa e industria di turismo. El a duna e ehempel di gruponan di mountain bike cu ta core den mondi y ta wordo ataca pa cachonan cu ta staciona tur caminda na banda di caminda.
Mas ainda, Presidente di pro cunukeronan Aubiano a señala cu e turistanan mes ta nota e situacion aki. “E turistanan ta hay’e pika y nan ta sinti duele,” el a splica, cu e situacion ta mustra cu tin bishitantenan a cuminsa referi na e situacion aki como un fraude den e bienestar di animal (animal welfare fraud).
Yamada pa respet y educacion
Den cuadro di e celebracionnan di 40 aña di Status Aparte, e cunukero a haci un apelacion na e caracter di e pueblo Arubiano y e necesidad di educacion. El a enfatisa cu Aruba tin leynan cla riba kico ta un mascota y kico ta un “pest,” y cu mester stop di kibra e leynan aki of falta respet na e orden publico di nos propio pais.
“Si nos ta un pais educa y nos kier hisa nos bandera di Aruba cu orguyo, percura cu e leynan di Pais Aruba ta wordo respeta fielmente pa tur ciudadano.