Den reunion publico di Parlamento siman pasa, Prome Minister Evelyn Wever-Croes a elabora riba su maneho di gobernacion na unda el a duna splicacion amplio riba e tema di integridad.
Integridad ta un di e puntonan di prioridad cu Gabinete Wever – Croes a stipula pa pone enfasis riba dje durante gobernacion 2017- 2021. Hopi esfuerso a wordo poni den desaroya y implementa un ‘integriteitsbeleid’ basa riba e siguiente puntonan: 1. Bureau Integriteit, cual a inicia cu ne na 2018; 2. Integriteitskamer, cu lo inicia cu ne na 2021; y 3. Corporate Governance Code, cu tambe a inicia cu ne na 2019.
Desde november 2017, Banco Central di Aruba a realisa un encuesta riba e tema di corupcion. Na 2019 e resultadonan a keda publica cual a ilustra cu 52% di e participantenan na e encuesta ta di opinion cu corupcion a aumenta na Aruba. Na 2019 tabatin un otro estudio riba corupcion y e resultadonan tabata similar. E tercer estudio a inicia na november 2020. Gabinete Wever – Croes ta apoya e iniciativa aki di Banco Central, como cu e ta riba e mesun liña cu e vision di Gobierno.
Pa por realisa un investigacion mas profundo riba e situacion di corupcion na Aruba, Gobierno a cera un acuerdo na 2019 cu Stichting Deugdelijkheid Bestuur Aruba pa hunto traha riba un ‘National Integrity System Assessment’. Conforme metodologia di “Transparency International”.
Ademas desde 1 mei 2020 e Commissie Corporate Governance a wordo instala pa asisti Ministerio di Asunto General, Integridad, Organisacion Gubernamental, Innovacion y Energia den e preparacion y implementacion di un cuadro legal pa e aspecto di “corporate governance” di entidadnan afilia na Gobierno.
Banda di esaki, Parlamento di Aruba tambe a duna di su parti pa encamina e trayecto di integridad. Parlamento a presenta 3 iniciativa cual dos di nan a wordo aproba. Ta trata di “Landsverordening Ombudsman” y “Landsverordening financiering politieke partijen”. E ley di screening di Minister ta den proceso di tratamento y ta pendiente riba conseho di Directie Wetgeving en Juridische Zaken. E trayecto lo wordo finalisa e aña aki.
Esakinan ta algun ehempel di esfuersonan continuo di Gabinete Wever – Croes pa promove integridad den Gobierno.
https://issuu.com/gabinetewevercroesaruba/docs/jaarverslag2020?fr=sZTVjNDIwOTgzNQ
