Parlamentario Stephany Sevinger a expresa lamentacion cu e proceso pa e introduccion di e Rijkswet HOFA ya a inicia, mientras cu Parlamento di Aruba awo mester warda e conseho formal di Raad van State prome cu e debate substantivo por sigui. No obstante, el a indica cu ta positivo cu sindicatonan a mustra confiansa den proceso democratico door di presenta nan punto di bista.
Segun Sevinger, e situacion actual ta resultado di un proceso formal cu ya ta den marcha. “Ta jammer cu e proceso a cuminsa caba y nos mester warda e consehonan pa drenta paden. Unabes cu e conseho yega, Parlamento por analisa si e contenido di e Rijkswet HOFA ta riba e mes un liña cu e postura y pensamento di Parlamento di Aruba,” el a declara.
Parlamento semper tin posibilidad pa hala atras
Den respuesta na preocupacionnan cu e decision final lo wordo tuma den Tweede Kamer, Sevinger a enfatisa cu e iniciativa aki ta trata di un consensus Rijkswet. Segun Sevinger, esaki nifica cu Parlamento di Aruba semper tin autoridad pa hala atras su apoyo si e contenido final no ta den interes di pais.
El a referi tambe na declaracionnan di un ex prome minister cu anteriormente a firma un Bestuurlijk Akkoord cu Hulanda. Segun Sevinger, e ex mandatario posteriormente a indica cu su intencion original tabata pa logra reduccion di interes, pero no necesariamente pa sigui un trayecto cu culmina den un Rijkswet. Parlamentario Sevinger a califica e cambio di posicion como un movimiento inconsistente cu, segun su opinion, por afecta confianza den relacion politico.
AVP ta defende proceso responsabel y cumplimiento di acuerdo
Sevinger a afirma cu fraccion di AVP ta para firme pa un proceso cu el a describi como husto y responsabel. Segun Sevinger, tur parlamentario mester trata e tema cu seriedad, specialmente considerando cu e relacion cu Reino Hulandes ta un componente esencial di e marco institucional di Aruba.
El a enfatisa cu ora acuerdo formal a wordo firma, pais tin responsabilidad pa cumpli cu e obligacionnan cu ta resulta di esey. “Ora nos ta firma acuerdo duro y responsabel, Aruba mester cumpli cu nan. Esaki ta loke fraccion di AVP ta para pe awe,” Sevinger a declara.
Proceso legislativo ainda no a conclui
Parlamentario Sevinger a explica cu, aunke e concepto di ley di e Rijkswet HOFA ya a wordo presenta, ainda no tin un ley definitivo. Segun Sevinger, Parlamento di Aruba a ricibi e concepto di ley riba 1 di mei 2025, despues cu gobierno a sinta riba 27 di maart di e mesun aña sin firma e ley final.
El a detaya cu e proceso formal ta sigui un serie di paso claramente defini:
- Parlamento di Aruba ricibi e concepto di ley
- E documento ta wordo manda na Raad van Ministers van het Koninkrijk (RMR)
- Posteriormente, e ley ta wordo manda na Raad van State pa conseho huridico
- Despues di e conseho, e proceso ta sigui su curso legislativo
Segun Sevinger, Parlamento mes a solicita pa e concepto di ley bay na Raad van State pa haya un opinion independiente. El a subraya cu hasta awe ningun voto final no a wordo tuma, lo cual nifica cu oficialmente ainda no tin un Rijkswet vigente, sino solamente un propuesta di ley riba mesa.
“E proceso ta claro: Parlamento ta haya e concepto di ley, despues e ta wordo manda pa conseho, y despues e ta sigui su caminda. Asina e sistema ta traha,”Segun Parlamentario Stephany Sevinger.