Nationaal Algemene Politie Bond (NAPB St. Maarten), Nationale Algemene Politiebond (NAPB Curaçao ) ta na Aruba y a reuni cu Sindicato di Polis Arubano (SPA) Segun Presidente di SPA Rondney Solognier e reunionnan aki ta tuma luga pa asina papia riba diferente puntonan pero tambe pa fortifica e lasonan entre sindicatonan principalmente riba landspakket,prestatiemanagment y pension. E topiconan cu a papia di dje ta topiconan comun cu ta toca e diensten nan entre e islanan y pesey mes ta delibera riba e puntonan pa fortifica e union di sindicatonan hunto cu e sindicatonan di islanan di Corsou y St maarten.
Presidente di sindicato SPA ta duna di conoce cu no tin duda cu cada isla ta aparta riba nan mes pero cu e problemanan cu tin riba e islanan ta comun na otro. Tin islanan tine miho cu e otro pero kier yuda y guia esun cu tin menos pa asina yega na nivel di e otronan. E reunionnan ainda ta andando y na final lo pone tur punto riba papel pa asina yega na conclusionnan. Den tur e proceso aki union ta haci forsa.
Rogerrel Mauricia ta president di NAPB St. Maarten y ta contento di ta na Aruba,Polis , inmigracion , Aduana, prizon tur tabata den reunion , esaki tabata un continuacion di reunion cu NAPB St. Maarten no a forma parti di dje pero aña pasa den un reunion na St Maarten tabata envolvi y esaki ta un di e continuacion di reunion cu a yega di tuma luga na Curaçao.
E reunion basicamente a bay riba problemanan cu tin den e aparato gubernamental di polis y por a nota cu e problemanan na St Maarten ta mes un cos cu esun di Corsou y Aruba. Segun Rogerrel Mauricia ta president di NAPB St. Maarten un di e puntonan cu sigur nan ta boga pe ta pa por baha e pension di polis di 65 pa 60 aña y laga e espacio di e polis mes si ta desea di sigui te cu 65 , pero primordialmente e deso ta pa e polis baha cu pension cu su 60 aña.
Na Aruba ya caba tin un draft y esaki lo hiba St Maarten pa asina ta presente na e miembronan di NAPB St. Maarten y si nan ta diacurdo pa asina presente na gobierno di St Maarten. Na momento cu nan presenta tur loke nan a reuni na Aruba cu ne na nan miembronan na St Maarten lo mester traha un plan di accion pa presenta na St Maarten.
E sindicato ta duna di conoce cu nan ta traha pa e beneficionan di nan miembronan y no ta desea pa nan miembronan ta sufri , pero pa trata di laga gobierno compronde con importante nan trabou ta y kico ta e risiconan cu nan ta hiba y cu nan merece un bon pago y un bon pension tambe. Segun Rogerrel Mauricia president di NAPB St. Maarten por a tuma nota cu tur tres isla tin e mes un situacion y e mes un problemanan den e organo gubernamental, Vriendjespoliek ta hunga un rol entre e organisacionnan gubernamental di e islanan. Importante ta pa e sindicatonan keda uni y keda reuni pa trece solucionnan pa nan miembronan. Diabierna awo lo ta e clausura di e reunionnan na Aruba y asina lo prepara pa e siguiente reunionnan cu mester tuma luga cu kisas ta na Corsou of St Maarten.
