Stichting HUNTO a marca un momento historico ayera cu e lansamento oficial di su United Mobil, un trailer movil crea pa atende y motiva personanan cu ta sufri di adiccion ambulante riba caya. E proyecto ta considera un logro importante pa e fundacion, despues di aña di trabou, dedicacion y colaboracion cu partnernan nacional y internacional.
Segun miembro di board di Stichting HUNTO, Randal van Tricht, kende ta responsabel pa e area financiero di e organisacion, e realisacion di e trailer United ta resultado di amor, pasion y profesionalismo di tur esnan cu a kere den e proyecto.
“E trailer United ta un logro hopi grandi. Hopi hende no a kere cu lo tabata posibel, pero ora tin dedicacion, profesionalismo y un base financiero serio, bo por logra metanan grandi,” Van Tricht a expresa.
Cuatro Pilar pa Recuperacion
E United Mobil ta forma parti di un sistema di cuatro pilar cu Stichting HUNTO a desaroya pa atende e problematica di adiccion den comunidad. Segun e fundacion, adiccion no ta un problema cu por wordo soluciona cu un solo paso e proceso di rehabilitacion ta un transicion compleho cu mester apoyo continuo.
E unidad mobil lo bay directo riba caya pa conecta cu personanan cu tin problema di adiccion, motivando nan pa haci e prome paso den e proceso di recuperacion. E meta ta pa guia clientenan for di e situacion di caya pa inloophuis, y posteriormente pa Centro Colorado, unda nan por haya asistencia profesional y apoyo pa sigui cu nan proceso di rehabilitacion.
Stichting HUNTO a indica cu inversionnan importante a wordo haci den tur e pilarnan pa asina tin un sistema completo y moderno cu por start cu e proceso di ayudo pa adictonan ambulante.
Apoyo di Sector Priva
Van Tricht tambe a destaca cu e rol di partnernan nacional y internacional tabata crucial pa logra e proyecto. E fundacion a enfrenta retonan financiero despues cu cambio di gobierno a resulta den reduccion di fondonan destina pa e iniciativa.
“Nos no a sinta cu man crusa. Nos a dicidi busca apoyo den sector priva,” el a bisa.
Danki na e colaboracion aki, varios compania a brinda apoyo financiero sustancial. Wind Creek a contribui cu USD 100.000, mientras CEDE Aruba y Aruba Bank tur dos a aporta Afl. 100.000 pa sostene e iniciativa.
Cooperacion Internacional
Ademas di apoyo local, Stichting HUNTO a ricibi asistencia di partnernan internacional. Entre nan tin Impact Cadelise Consultant, un consultoria cu mas di 20 aña di experiencia den proyecto similar na Estados Unidos, y About Our Father’s Business, cu a yuda diseña y desaroya e trailer United especificamente pa Aruba.
Segun e fundacion, e colaboracion entre organisacionnan internacional y institucionnan local ta demostra cu cooperacion global por contribui directamente na bienestar di comunidad.
Cu e lansamento di e United Mobil, Stichting HUNTO ta spera di fortalece significativamente su capacidad pa atende e problematica di adiccion riba caya y guia mas personanan rumbo na rehabilitacion y reintegracion den sociedad.
Pa e fundacion, e iniciativa aki no solamente representa un proyecto social, sino tambe un ehemplo di con colaboracion entre sector priva, organisacionnan social y partnernan internacional por genera solucionnan concreto pa retonan social na Aruba.
