Diadomingo ultimo cu a pasa, minister Maduro, riba invitacion di Sr. Charles Croes, a bay mira e pelicula ‘Chronico’ hunto cu e grupo di hoben studiante di Caribbean Arts Aruba.
Tabata un anochi ameno caminda cu despues di a mira e pelicula produci localmente, minister Maduro tabata tin e placer di por a combersa cu e hobennan presente riba locual ta trata nan aspiracion pa un dia bira actor nan mes y asina aporta na e industria creativo di Aruba. Aparte di e hobennan aki cu tabata presente, parti di e elenco di e pelicula tambe a bini hunto un rato pa asina combersa cu e minister riba nan experiencianan pa cu e pelicula aki.
E hobennan di Caribbean Arts Aruba a expresa di ta aprecia cu minister Maduro a topa cu nan y tambe pa combersa cu nan tambe riba locual ta nan aspiracion. Minister Maduro na su turno ta sumamente agradecido pa e invitacion cu el a ricibi for di Sr. Charles Croes pa por a comparti un rato ameno cu e studiantenan aki y ta deseanan tur clase di exito den e mundo di actuacion.
