Gobièrnu di Kòrsou a yega na e desishon pa e aña aki mantené e montante di Fls. 9,62 pa ora ku a keda stipulá na aña 2020 komo tarifa pa suèldu mínimo. E montante aki, ta stipulá den e Areglo di Indeksashon Suèldu Mínimo 2020.
Pa a yega na e desishon aki, Gobièrnu a tuma den konsiderashon konsehonan di entre otro Sociaal Economische Raad (SER), Ministerio di Desaroyo Sosial, Labor i Bienestar (SOAW), Ministerio di Desaroyo Ekonómiko (MEO), Ministerio di Finansa i Ministerio di Asuntunan General (WJZ).
Pa minimalisá posibel konsekuensianan mará na e echo ku e suèldu mínimo no ta keda indeksá e aña aki, Gobièrnu di Kòrsou ta proponé pa:
- Yega na medidanan dirigí pa duna èkstra sosten na esnan den nos komunidat ku ta risibí un suèldu mínimo;
- Hasi un investigashon riba e posibel efektonan sosial ekonómiko mará na un posibel oumento di e suèldu mínimo;
- Tene dos (2) diferente konferensia ku e temanan:
a) Suèldu mínimo, trabou desente i produktividat
b) Seguridat, salubridat na trabou i futuro laboral;
Instituí un grupo di trabou ku ta konsistí di representantenan di SOAW, MEO i Ofisina Sentral di Estadístika (CBS) kendenan lo ta enkargá pa profundisá riba e tema di ‘Maneho i medidanan dirigí riba e parti di nos komunidat laboral ku ta risibí solamente e suèldu mínimo òf tin bia ménos ku esei’.
