PoliticaFeaturedLocal

Ta incomprendibel cu tin parlamentario y gremio kier pa Gobierno firma RAft “as is”

Eng It Is Incomprehensible That Some Parliamentarians And Trade Unions Want The Government To Sign The Raft.3

Analisando e desaroyo den opinion y pensamento ultimo dianan encuanto e negosacionnan andando entre Gobierno y Hulanda pa loke ta trata refinanciamento di nos debe cu Hulanda, mi ta keda preocupa. Urgi of kier exigi Gobierno pa sin mas acepta RAft “as is” como condicion ta algo incomprendibel. Esaki ta e caso caba si solamente nos mira e trayecto encamina y postura demostra pa Hulanda. 

Pero ban laga esakinan un banda y ban analisa e impacto cu cierto normanan ancra den e concepto di ley lo por tin pa nos pais. No solamente Fraccion di MEP a bin ta señala esakinan, pero tambe Raad van State di Hulanda, Raad van Advies di Aruba, Evaluatie Adviescommissie cu a evalua RFT (ley di supervision financiero di Curaçao y Sint Maarten) y e experiencia di nos rumannan isla cu RFT.

Corectamente Raad van State di Hulanda ta indica den su conseho (No.W04.20.0423/I/K pag.

4) cu e normanan ta para den caminda pa por haci inversion den nos pais. Banda cu mester percura cu nan ta realistico, alcansabel y sin consecuencia negativo, tambe mester tene debido cuenta cu e impacto cu nan por tin a largo plaso pa nos pais. Pasobra e realidad ta cu e normanan ta tranca e capacidad di crecemento di nos economia door di limita e posibilidad di haci inversionnan necesario y importante. Pa fortalece nos economia y pa e ta uno mas robusto, duradero y sostenibel, nos mester haci nos pais menos dependiente di turismo. Pa logra esaki nos mester crea pilar(nan) economico nobo door di inverti den diversificacion.

Door di e normanan esaki ta keda obstaculisa pasobra e inversionnan necesario no por tuma lugar. E norma aki a impacta negativamente e desaroyo economico na Curaçao y Sint Maarten. Dus ta incomprendibel cu Hulanda kier sigui impone dicho norma riba Aruba tambe.

For di e conseho di e Evaluatiecommissie 2021 ‘Toezicht en beheer in het teken van groei’ (evaluacion di Rft Curaçao/Sint Maarten di añanan 2018-2020) cu e islanan ta indica cu e manera con supervision ta keda realisa actualmente tin efecto indesea riba e desaroyo di un strategia socio-economico a largo plaso. Diferente rason ta keda presenta, por ehempel, cu e normanan ta conta aña tras di aña y por lo tanto nan no ta ofrece e margen necesario pa por haci inversionnan importante y necesario  cu den futuro mester percura pa e rendimento necesario y desea. Tampoco e normanan ta tene cuenta cu “consumptieve uitgaven” tambe por tin nan rendimento economico structural of pa algun aña manera por ta e caso cu enseñansa. 

Na Europa tin acuerdo cu e presupuesto mester ta den balans of mester tin un surplus. Sin embargo, e obhetivo aki no mester keda alcansa de inmediato, mas bien e paisnan di EU mester demostra cu nan ta trahando pa logre. Ta keda teni debido cuenta cu loke a largo plazo ta deseabel y mihor pa e pais, na lugar di anualmente controla si ta cumpli cu e normanan. Mi ta di opinion cu esaki mester conta igual pa Aruba y otro islanan. Mas cu claro mester percura pa e condicionan dentro di cual esaki tin cu tuma lugar.

Pa es motibonan aki mes mi ta di opinion cu mester tene cuenta cu e diferente consehonan cu tin riba mesa y alabes ta e momento ideal pa evalua LAft y RFT prome cu kier impone un supervision cu conoce su retonan y impacto negativo y indesea.

Related posts

Minister Maduro a atende reunion virtual di IMF riba e efecto di COVID19 pa Paisnan den Caribe

EA News Author

Un Poco Di Tur Cos Rond Mundo

EA News Author

Abraham Maslow a crea un piramide di prome necesidad di un ser humano tin mester did je pa tin un bida den balans

EA News Author

Leave a Comment

Whatsapp Message