Resientemente Tourism Corporation Bonaire (TCB) a firma un akuerdo ku e organisadónan/promotornan di e evento kultural nobo ‘Kings of Krioyo, It’s in our Nature’ den un intento pa selebrá e patrimonio kultural di nos isla i fiha atenshon riba e artistanan lokal ku ta mantené nos músika krioyo bibu.
Na e evento, ku ta tuma lugá pa promé biaha, lo por apresiá artistanan ku durante e dos añanan tras di lomba tabata aktivo i otronan ku den pasado tabatin vários hit, inkluso e artista ku ya a keda anunsiá, kende ta Chendell Beaumont.
Kings of Krioyo ta tuma lugá dia 8 di aprel 2023 na Kabuya Ranch, un sitio ku nan a skohe pa su nifikashon kultural i históriko. Segun espektativa e evento lo no trese solamente e komunidat lokal huntu, pero lo atraé bishitantenan for di eksterior tambe pa eksperensiá nos músika krioyo yen di zjeitu.
Meta di e evento ta konservashon di e músika kultural di nos isla i pa ofresé nos artistanan lokal un plataforma pa mustra nan talento. Ku e ‘line-up’ di artistanan ku ya kaba ta konfirmá, Kings of Krioyo ta primintí di bira un selebrashon eksitante di Boneiru su patrimonio kultural riku i alabes un chèns pa nos bishitantenan drenta den e esena musikal vibrante di nos isla.
Miles Mercera: “Nos ta inkreibelmente orguyoso i entusiasmá tokante e evento di Kings of Krioyo ku ta biniendo. Selebrashon di Boneiru su patrimonio kultural ta un manera fantástiko pa kuminsá luna di aprel kuné, na kaminda pa e festividatnan di Dia di Rincon. Nos ta kere ku e evento akí no solamente lo trese nos komunidat huntu, pero ku e ta ofresé nos bishitantenan tambe un oportunidat úniko pa eksperensiá e esena musikal bibitu di nos isla i haña sa mas tokante nos raisnan kultural.”
Un di e metanan mas importante, komo parti di e Plan di Rekuperashon di Turismo, ta pa mehorá e eksperensia turístiko pa medio di pone énfasis riba kultura, arte kulinario i e variedat di aventura riba tera i den laman di Boneiru. Nos ta konsiderá e aktividat akí komo un evento nobo karakterístiko konforme nos metanan kultural turístiko.
