Durante di e weganan olímpiko na Tokio, e windsurfer Kiran
Badloe di 26 aña a gana e medaya di oro i el a risibí un rekonosementu pa su logro, organisá dor
di Tourism Corporation Bonaire (TCB). Djaweps dia 5 di ougùstùs, Direktor di TCB, señor Miles
Mercera, a entregá un invitashon personal na Kiran pa e por bin bishitá Boneiru, na e tereno
‘Olympic Festival’ na Scheveningen. Kiran ku a biba na Boneiru entre edat di 7 pa 10 aña a
kuminsá windsurf na edat di 9 aña. El a haña su promé lèsnan, i na aña 2003 a partisipá na su
promé kompetensia den Regatta na Boneiru. Kiran a menshoná ku den futuro e lo bai train na
Boneiru pa un temporada largu.
Durante di e seremonia di honor pa e logro di Kiran ku e medaya di oro, Direktor di TCB, señor
Miles Mercera, no tabatin nada otro ku elogio pa Kiran, kende tabata residente di Boneiru. “Nos
ta ofresé e invitashon aki komo un gran muestra di nos gradisimentu i pa felisitá bo pa e gran
logro aki i pa invita bo pa bin bèk kaminda bo karera di windsurf a kuminsá. Ademas, nos ta
hopi orguyoso di bo logronan. Nos ta invitá bo bin hasi uso di e fasilidatnan di windsurf ku nos
tin pa train i pa disfruta a lo máksimo di loke Boneiru tin.”
Kiran a sinti’e honrá pa e atenshon di Boneiru i e invitashon pa regresá e luga di su infansia
kaminda el a siña windsurf. “Mi tin hopi bon rekuerdo di Boneiru i e komienso di mi karera di
windsurf ta einan. Un luga pa train ku bientu konstante i ku bon wer ta bal oro di berdat, pues
mi lo ke pa Boneiru ta mi luga permanente pa train den futuro. Ademas, mi ke kompromete mi
mes di trese un kompetensia profeshonal i internashonal na Boneiru”, e kampion olímpiko a
bisa.
Den komienso di siman, e komunidat lokal di windsurf a graba i a manda un video personal pa
Kiran. E windsurfer Constantino ‘Patun’ Saragoza a felisitá Kiran ku su logro. Tambe el a
kompartí den un entrevista su memorianan di dia ku el a partisipá na e weganan olímpiko na
Barcelona na 1992 i Atlanta na 1996, i a duna bunita palabra tokante e prestashon di Kiran na
Tokio. E ‘guru’ di windsurf lokal, Elvis Martinus, a konta den e video tokante su promé
memorianan di Kiran dia el a siña windsurf. “Mi a kuminsa ku un programa pa siña muchanan
windsurf na Sorobon i Kiran tabata un di e prinsipiantenan. Tòg el a bai Florida pa un
kampionato di hobennan, pues e tabatin e ‘drive’ for di chiki. Mi tin sigur ku e prestashon di
Kiran lo stimulá nos hobennan pa siña windsurf, òf pa nan sigui desaroyá nan mes den esaki. E
bahia bunita di Lac ta bon pa oro i ta produsí kampionnan den windsurf”, Elvis Martinus a bisa.
E video i entrevista ku Saragoza i Martinus por wòrdu mira riba TCB su
página di Facebook i di YouTube: www.facebook.com/TourismCorporationBonaire i
www.youtube.com/BonaireTourism.
1 comment
[…] Source link […]