Tourism Corporation Bonaire (TCB) ta kontentu di por anunsiá lansamentu ofisial di e Bonaire Signage Project – Proyekto di Señalisashon na Boneiru, un inisiativa inovador den kolaborashon ku Fundashon Históriko Kultural Boneriano (FuHiKuBo) i Entidat Públiko Boneiru. E kolaborashon akí ta marka un paso importante den direkshon di enrikesementu di eksperensia di nos poblashon lokal i di nos bishitantenan pa medio di ofresé un bista balioso den historia i patrimonio kultural di nos isla.
E meta mas prinsipal di e Proyekto di Señalisashon na Boneiru ta pa amplia e bentahanan di desaroyo di turismo pa medio di eduká nos komunidat i proveé bishitantenan ku informashon eksakto tokante e patrimonio tangibel i intangibel i tokante historia di Boneiru pa medio di un programa amplio di señalisashon.
E título di e bòrchi ‘What’s In Our Nature’, tin un nifikashon úniko i e ta indiká e atraktividat outéntiko i e karakterístikanan mas importante di nos isla. E ta un invitashon pa deskubrí e tesoronan natural di nos isla, sumergí bo mes den e patrimonio kultural yen di bida i eksperensiá e hospitalidat sinsero ku ta karakterisá Boneiru komo un destinashon úniko i atraktivo. E ta enkurashá bishitantenan pa no deskubrí solamente e bunitesa físiko di nos isla, pero tambe e balornan i tradishonnan ku rais profundo ku ta hasi Boneiru úniko.
FuHiKuBo ta hunga un ròl sentral den e kolaborashon ambisioso akí pa medio di aportá ku material kasi inbalorabel for di nan kolekshonnan i archivonan ekstenso. Hasiendo uso di nan ekspertisio, FuHiKuBo a yuda ku selekshon di e sitionan, e storianan balioso tokante e sitionan akí i imágennan bieu di e monumentonan i atrakshonnan akí. Den e promé fase di e proyekto a pone 26 bòrchi rònt nos isla, ku ta tira lus riba diferente sitio históriko, atrakshonnan turístiko popular i aspektonan kultural kulminante di nos isla.
‘Ora ku nos kuminsá e biahe eksitante akí ku e Programa di Señalisashon, esaki ta rekòrdá nos ku e bunitesa berdadero di nos isla no ta solamente den nos maravianan natural, pero tambe den e diversidat riku di nos kultura i historia. ‘What’s In Our Nature’ no ta djis un bòrchi, pero e ta un invitashon habrí pa deskubrí kurason i alma di Boneiru. Nos ta kere ku pa medio di kompartí nos storianan, nos ta krea konekshonnan duradero. Laga nos selebrá huntu e esensia di Boneiru i e kalor di su hendenan’, segun Miles Mercera, direktor di TCB.
TCB su aspirashon ta pa yega na mehorashon di e kalidat general di e oferta turístiko di nos isla. E Proyekto di Señalisashon Boneiru ta un añadishon remarkabel na e paisahe turístiko di nos isla. E ta ofresé un mihó komprendementu di patrimonio i historia di nos isla i e ta duna un kordial bon biní na tur hende ku ta bishitá e bunita destinashon akí.
