Trabounan pa asfaltá kaminda djabou den full swing

Trabou pa basha asfalt riba kaminda djabou ta kanando bon. Dentro di poko e kaminda akí lo ta habrí atrobe. Pa aselerá e proyekto a pone ekipo èkstra pa hasi e trabounan di kobamentu simultáneamente. 

Djaweps 8 di yüni a kuminsá ku e di dos fase di e mantenshon di Kaminda Djabou. 

Esaki despues ku a terminá ku e parti di mantenshon grandi di e promé fase. Den e simannan ku ta bini lo pone e kapa final riba e promé fase te ku Kaya Sirena pa despues terminá e último fase ku ta for di Kaya Sirena te ku Kaya Neerlandia. 

Diputado Thielman a pone su mes na altura di e avanse di e trabounan na Kaminda Djabou. Diputado Thielman ta bisa: “Ta importante pa menshoná ku nos ta drechando Kaminda Djabou awor pasobra denter di poko lo bai kuminsá ku trabou di fase 3 pa drecha Kaya Korona. Esei ta nifiká ku e otro kayanan mester ta drechá pa outo por desviá via nan. Pa esei nos ta drechando Kaminda Djabou awor.”