Departamento di Public Administration & Organizational Science (PAOS) na Universidad di Aruba cu orguyo a celebra e finalisacion exitoso di su prome cohort di Premaster den Governance & Leadership (PMGL) durante un ceremonia di entrega di certificado riba
diabierna, 3 di juli 2026
Diesshete profesional for di sector publico, priva y social, a ricibi nan certificado despues di completa exitosamente e programa PMGL, marcando un logro importante pa tanto e departamento como enseñsansa den maneho na Aruba. Diseña como e trayecto preparatorio pa e Master in Governance & Leadership (MGL), e PMGL ta ofrece profesional for di diferente background educacional e base posgrado necesario pa sigui estudio di nivel academico mientras nan ta sigui contribui na nan organisacion- y comunidadnan.
A desaroya e PMGL como parti di PAOS su compromiso pa expande e oportunidadnan educacional den maneho y liderazgo mientras cu ta responde na e demanda creciente di Aruba pa profesional altamente capacita pa enfrenta e retonan publico, organisatorio y social compleho cu ta aumentando. Como un parti integral di PAOS, e programa ta refleha e departamento su contribucion continuo na Aruba su desaroyo sostenibel door di inverti den lider den tur e sectornan publico, priva y esunnan sin fin di lucro. Door di fomenta colaboracion, pensamento critico, tumamento di decision a base di informacion, PAOS ta sigui fortifica capacidad di maneho y crea balor duradero pa e comnidad di Aruba.
Apertura di e ceremonia tabata na encargo di Dr. Mieke de Droog, Dean di Faculty of Arts & Science (FAS), sigui pa observacion di Ahmet Talan, MSc, manager di e programa di Bachelor in Organization, Governance & Management (OGM), y Thaïs Franken, MSc, Manager di e programa di Master in Governance & Leaders (MGL). Franken a reflexionana riba e desaroyo di PMGL, el a felicita e cohort inaugural pa a logra e meta importante aki y a yama esunnan cu ta continua cu nan trayectoria academico den Master in Governance & Leadership e aña academico aki.
Rondona pa nan compañe- di estudio, profesor-, miembro- di famia, y amigonan e graduadonan orguyosamente a ricibi nan certificadonan como reconocimento di nan dedicacion, perseverancia, y logro academico. E anochi aki no a celebra solamente e finalisacion exitoso di e programa, pero tambe e cuminsamento di un capitulo nobo ya cu hopi di e graduadonan ta continua cu nan trayectorio educativo den Master in Governance & Leadership.
Un momento cu a resalta durante di e ceremonia tabata otorgamento di e PMGL Academic Excellence Award na Charlene Nectar, kende a logra e grado promedio mas halto di e cohort inicial. Despues di a ricibi e reconocimento, Nectar a dirihi su mes na e audiencia, reflexionando riba e experencia- memorabel, retonan y e crecemnto personal cu el a comparti cu su compañenan di klas durante e programa PMGL. El a expresa su gratitud na e profesornan, famia, y su compañenan di estudio kendenan a sostene durante e trayecto y a comparti cu ne su emocion pa sigui hunto cu e Master in Governance & Leadership.
E departamento di PAOS ta manda su mas sincero felicitacion na tur diesshete graduado. Nan logronan ta representa mas cu e finanalisacion exitoso di un programa academico, nan ta refleha un compromiso comparti na siñamento continuo, excelencia profesional, y fortificacion di maneho dentro di organisacion- y comunidadnan.
Mientras e departamento ta prepara pa yama bonbini na un grupo nobo di profesional den e aña academico nobo, PAOS ta keda comprometi na desaroya “Lider Visionario cu ta Forma Maneho” door di ful su trayecto educacional, cu ta consisti di e Bachelor in Organization, Governance & Management (OGM), e Premaster in Governance & Leadership (PMGL), y e Master in Governance & Leadership (MGL).
Registracion pa e Master in Governance & Leadership pa 2026-2027 a clausura awo, Sinembargo, profesionalnan interesa pa sigui e MGL den futuro por inscribi pa e cursonan di PMGL cada aña academico como un studiante oyente. E deadline pa regista pa e cursonan di PMGL pa e aña benidero ta 15 di augustus, 2026.
Pa mas informacion tocante e programanan PAOS, e futuro studiantenan por tuma contacto cu Office of Student Affairs via osa@ua.aw, e Bachelor in Organization, Governance & Management (OGM) via ogm@ua.aw, of e Master in Governance & Leadership (incluiendo PMGL) via mastergl@ua.aw.
Sigui departamento di PAOS riba Facebook y Instagram via @ua_ogm.mgl pa keda informa tocante di nos programa-, evento-, y iniciativanan educativo.
