Universidad di Aruba (UA) a oficialmente habri e aña academico 2026–2027, continuando cu un tradicion anual cu ta celebra enseñansa, liderazgo y e papel importante cu Universidad tin den forma e futuro di Aruba.
Exactamente 38 aña pasa, Gobierno di Aruba a yega na un acuerdo cu e Bisdom di Willemstad pa haci uso di Huize de la Salle, e antiguo luga di biba y cultu di e Frères. Den mesun aña, mientras e Frères tabata celebra 50 aña di Huize de la Salle, Universidad a habri su portanan pa su prome 50 studiante. Awe, 38 aña despues, UA ta duna bienvenida na 899 studiante inscribi—un refleho significativo di e crecemento y e importancia di enseñansa superior na Aruba.
Como ta dicta e tradicion, e aña academico a cuminsa cu un ceremonia oficial, unda representantenan distingui di diferente sector di Aruba a reuni. Universidad tabata tin e honor di conta cu presencia di Gobernador di Aruba, Su Excelencia Alfonso Boekhoudt, Prome Minister Sr. Mike Eman, Ministra di Relacionnan den Reino, Enseñansa, Hubentut, Innovacion y Deporte, Su Excelencia Gerlien Croes, honorabel miembronan di Parlamento, Presidente y miembronan di e Hunta di Supervision, y e comunidad di UA, incluyendo studiantenan, docente y personal.
Minister Croes a oficialmente habri e aña academico 2026–2027. Despues, Rector Sue-Ann Lee a comparti reflexionnan riba liderazgo, responsabilidad y resiliencia, poniendo enfasis riba e hecho cu vulnerabilidad no ta debilidad, sino un luga unda nos por siña, crece y crea. E la recorda e comunidad di UA tambe cu resiliencia institucional no ta nifica cu nos nunca lo disagree, comete fout of fracasa; mas bien, e ta visibel den con nos ta responde, con nos ta siña, con nos ta adapta, con nos ta tuma responsabilidad y si nos ta sigui move padilanti hunto.
E discurso principal di e anochi a wordo duna pa Sra. Jurima Bryson, e prome Ombudsman di Aruba, bou di e tema “Conocemento, Husticia y Confiansa: Trahando na Construccion di Institucionnan Resiliente pa Generacionnan Futuro.” E la recorda e publico cu conocemento ta duna hende e capacidad pa compronde nan derechonan y tene institucionnan responsabel; cu husticia ta pidi un trato justo y proporciona; y cu confiansa mester wordo gana door di actuacion consistente, responsabel y digno di confiansa.
Despues di e ceremonia formal, e celebracion a continua den e bunita patio di Universidad cu un recepcion cu catering di Endeavor Catering, unda invitadonan a haya e oportunidad pa conversa, conecta, intercambia ideanan y celebra enseñansa y comunidad.
Universidad di Aruba ta expresa su sincero agradecemento na tur esnan cu a contribui na haci e anochi aki tan special, nos invitadonan, partnernan, oradornan, organizadornan, personal, studiantenan y tur esnan cu ta sigui kere den e importancia di enseñansa y den e papel di Universidad pa fortalece Aruba y su generacionnan futuro.
