Debí na e eksitoso proyekto piloto anteriormente e aña aki riba Dia di Rincon, Kuerpo Polisial Hulanda Karibense (KPCN) lo hasi uso di vigilansia di kamara durante aktividatnan di Regatta tambe. For di djárason 9 di òktober 2024 te ku djadumingu 13 di òktober 2024, lo usa kamaranan móbil pa vigilá diferente aktividat na okashon di Regatta. E vigilansia di kamara temporal aki lo ta parti di un evaluashon mas amplio di vigilansia ku kamara durante aktividatnan kaminda ta spera un públiko grandi, ku e meta pa garantisá seguridat i usa kapasidat polisial na un manera efisiente.
E resultadonan positivo di e proyekto piloto anteriormente e aña aki, na kua vigilansia di kamara a kontribuí na mantenshon di orden públiko, akshon polisial mas efisiente i pa e seguridat di públiko, a kondusí na kontinuashon di e inisiativa aki. Durante di Regatta, KPCN ta spera di bolbe haña un bista balioso tokante e efektividat di vigilansia di kamara na eventonan grandi.
Vigilansia di kamara pa seguridat i planifikashon efisiente di kapasidat polisial
Durante di Regatta lo instalá kamaranan di seguridat na vários sitio stratégiko. E meta di e medida aki no ta pa solamente mantené òrdu públiko, pero tambe pa mehorá e seguridat di bishitantenan i pa sostené polis i otro servisionan di emergensia pa reakshoná lihé riba insidentenan. Ku e kamaranan, polis por mira imágennan bibu (live) i tuma akshon mesora kaminda ta nesesario.
Pa e vigilansia di kamara ta hasi uso di 12 kamara na e siguiente sitionan:
- Vigilansia di kamara riba Kaya J.N.E. Craane na altura di Karels Beach Bar
- Vigilansia di kamara riba Kaya J.N.E. Craane na altura di Passangrahan
- Vigilansia di kamara riba Plasa Reina Wilhelmina na altura di e ofisina di Kolegio Ehekutivo
- Vigilansia di kamara riba Kaya Grandi na altura di Ofisina di Turismo (TCB)
- Vigilansia di kamara riba Plasa Niki Tromp (antes Oranjeplein)
- Vigilansia di kamara riba Kaya Kòrsou
- Vigilansia di kamara riba Kaya L.D. Gerharts
- Vigilansia di kamara riba Kaya Nikiboko Sùit na rotònde Sùrnan di Roozendaal
- Vigilansia di kamara riba Kaya Nikiboko Sùit na rotònde Sabana
Kiko ta pasa ku e imáhennan di kamara?
Lo prosesá e imáhennan di kamara si tin mester di un bon ehekushon di tareanan polisial diario (Artíkulo 8 Wpg). Lo destruí e imáhennan grabá despues di máksimo kuater siman. Si den kaso ku tin motibu konkreto dentro di kuater siman ku ta suponé ku e imáhennan di kamara ta nesesario pa investigashon di un echo kastigabel, e ora ei por sigui hasi uso di e imáhennan pa e meta aki. E términonan pa sigui hasi uso di esaki ta bálido e ora ei.
Bo a mira algu sospechoso? Yama 717 8000 òf e liña di tep anónimo 9310.