Recientemente, Parlamentario Carlos Bermudez di fraccion AVP a tuma nota di declaracionnan publico di diferente mandatario tocante un posibel reapertura di e frontera cu Venezuela. Alabes Bermudez a indica cu varios ciudadano a acerca su persona buscando mas informacion y claridad tocante e tema aki. Esaki ta precisamente e motibo cu Bermudez a presenta un serie di pregunta por escrito na Minister President, mr. Mike Eman.
E frontera cu Venezuela ta cera desde aña 2019. Un posibel reapertura ta un asunto compleho cu lo mester tene cuenta cu e situacion geopolítico, di siguridad y economico. Ademas, un decision di e magnitud aki no ta depende solamente di Aruba y Venezuela, sino cu mester tene cuenta tambe cu posicion y consideracionnan di Hulanda.
Pa crea mas claridad riba e tema aki, Parlamentario Bermudez a presenta seis (6) pregunta na Minister President mr. Mike Eman:
Gobierno di Aruba a tene reunion(nan) cu mandatario, instancia of autoridad relevante di Venezuela y Hulanda tocante un posibel reapertura di e frontera? Si e contesta ta afirmativo, cua instancia a participa y cual ta e resultadonan principal di e reunion(nan)?
Tin plannan concreto actualmente pa cu e reapertuta di e frontera cu Venezuela?
Si tin plannan concreto, minister por indica cua fecha ta contempla pa e reapertura, of cua ta e fecha cu lo tuma decision definitivo riba e asunto?
Cual condicion of requisitonan ta mara na un posibel reapertura di e frontera?
E reapertura lo aplica tanto pa trafico aereo como pa trafico maritimo?
Cua tabata, of cua ainda ta, e principal obstaculonan pa e reapertura di e frontera, considerando cu Corsou a habri su frontera cu Venezuela algun aña atras caba?
Finalmente, Bermudez ta enfatisa cu cualkier reapertura di frontera mester tuma lugar di un forma responsabel, bon prepara y cu e garantianan necesario pa cu siguridad y bienestar di Aruba.
Parlamentario di AVP, Ing. Carlos Bermudez: Pregunta na gobierno encuanto reapertura di frontera cu Venezuela
