E discusion principal na Aruba den e dianan aki, locual ta mara directamente na e futuro di nos pais, ta den man di e leynan di Reino: e Rijkswet HOFA y LWHO. E defensornan di e leynan aki, encabesa pa e Gobierno di AVP-FUTURO, a hinca Aruba den un situacion unda e presion y intimidacion di Hulanda cu a cuminsa for di tempo di Secretario di Estado Raymond Knops a pone Aruba lomba pa muraya.
E presion aki a bin den e momentonan mas dificil, net banda di e debe enorme cu AVP a crea cu e proyectonan PPP entre aña 2005 pa 2017. E maneho ey a hinca Aruba den un posicion financieramente inaceptabel, y ora cu e pandemia a dal, Hulanda a probecha di e vulnerabilidad aki pa impone condicionnan strick.
E scenario tabata un crusada legal y financiero: si no firma e bestuurlijk akkoord pa habri caminda pa e Rijkswet, Aruba lo no a haya e liquiditid crucial pa sobrevivi. E consecuencia directo di no firma lo tabata un colapso total: e aparato gubernamental lo a crash, lo tabatin un riesgo halto di vandalismo y tension social debi na e falta di fondo pa paga ambtenaarnan, scarsedad di cuminda, y un menasa directo riba siguridad nacional.
Sinembargo, un bestuurlijk akkoord den su esencia legal ta un compromiso ehecutivo y no un ley final aproba. Huridicamente, esaki ta nifica cu e espacio pa negosha e puntonan mester a keda atendi debidamente y cu transparencia prome cu formalisa e acuerdonan pa converti nan den un Rijkswet.Esaki no a tuma luga.
Pero nos tur sa caba cu, den e transicion di e acuerdo preliminar ey pa e Rijkswet actual, e transicion y e cambionan structural a keda sellow formalmente door di e Gabinete di AVP-FUTURO.
Negociacion tras di cortina y un cambio di 180 grado di prome minister Mike Eman.
Locual ta causa indignacion den e comunidad ta cu e negociacionnan aki a tuma luga tras di cortina, sin un consulta debi cu Parlamento di Aruba , no a yama e reunion back te dia di awe y esaki ta muestra cu Presidente di Parlamento di Aruba ta totalmente lomba pa pueblo?.
Ta bisto na un cambio radical di 180 grado di parti di Prome Minister Mike Eman. Despues di tabata un opositor feros contra un Rijkswet pa Aruba, awe e “simiyanan politico nobo” cu ta mustra di ta pone placa prome cu nan principio encabesa pa Minister Geoffrey Wever y Gerlien Croes kier entrega e control di e pais na Hulanda.
Con nos ta yama e proceso aki? Un maneho entregista? Un entrega di e pueblo cu a deposita su confiansa y voto den nan?
E pretexto principal cu e mandatarionan aki ta uza ta cu Aruba lo bay haya un suma grandi di placa pa inversion. Sinembargo, nan mes no sa ni kico e suma real ta. E conseho di Raad van State tabata masha cla y contundente: no tin claridad ni transparencia riba e cantidad di placa cu Hulanda lo presta Aruba pa e proyectonan PPP aki. Basicamente, un di dos ola di proyectonan PPP, uza e mesun sistema financiero cu a hinca Aruba den e problemanan grandi di debe den pasado.
Esaki ta demostra cu e mercadeo y propaganda di e “tres cabesnan” cu ta pusha e Rijkswet HOFA aki ta un maneho sin pia sin cabes, aleha di e bienestar di Aruba, y enfoca riba un intento pa sigui influencia comunidad structuralmente cu promesnan bashi.
Te dia di awe, oficialmente Gobierno di AVP-FUTURO na ningun momento a duna un anuncio oficial, ni a habri un espacio publico y nacional pa duna informacion riba kico realmente ta e pensamento di gobierno y e trabou cu nan a haci cu e Rijkswet HOFA, cual lo tin un efecto severamente negativo pa Aruba. Ta mustra cu e gobierno ta sconde pa pueblo e realidad cu nan ta causando ?
E falta di duna cara y di asumi responsabilidad democratico ta lanta e cuestionamento: Con por categorisa e actitud aki? Como un falta total di balentia politico?
Oposicion ta informa, miertras AVP ta uza Flyer pa scondi realidad.
Mientrastanto, e panorama politico ta mustra dos direccion completamente opuesto:
MEP y PPA den accion: E fraccionnan di MEP y PPA ta reuniendo activamente cu diferente gremio y ta duna informacion nacional extensivo.
E meta ta pa duna Aruba un conocemento completo riba e posicion real, e daño, y e pensamento “entregista” di e gobierno actual. E leynan HOFA y LWHO no solamente ta afecta e ciudadano awe, sino cu lo mara e siguiente generacionnan cu lo no biba den e libertad cu nos a lanta aden.
Cu e leynan aki, e maneho politico local ta perde su forsa, transformando Parlamento di Aruba den un simpel “marioneta” di Hulanda, unda instruccionnan ta bin di exterior pa wordo implementa sin cu Aruba tin un voto of un input directo riba su propio destinacion.
E propaganda di AVP: Di otro banda, partido AVP a saca un flyer cu hopi “sucu” pa purba mustra supuesto logronan den un aña, sirbiendo como un distorcion visual. E flyer aki ta core paralelo cu e despedida di Prome Minister Mike Eman como lider di AVP, kende lo baha na September proximo.
Rumornan den gangnan gubernamental: Un puesto a cambio di Status Aparte?
Den e gangnan di edificionan gubernamental tanto na Hulanda como na Aruba, e rumor ta coriendo fuerte cu e deseo personal di Prome Minister Mike Eman ta pa bira e proximo Gobernador di Aruba, mirando cu e termino di e Gobernador actual ta yegando na su fin. Pa un persona por solicita pa e puesto halto aki, e marco legal ta stipula cu e mester ta por lo menos dos aña completamente fuera di politica activo.
E cuestionamento den pueblo ta si e rumor aki tin un fundeshi real y si e puesto aki ta e “prijs real” pa cual Prome Minister Mike Eman a cede e autonomia pa cual su antepasadonan a lucha cu sanger y bida.
Hopi ta compara e situacion aki cu locual a sosode den e historia politico 12/8, un crisis cu e mesun dinastía di Eman a ocaciona den pasado na Aruba.
Conclucion: E ora di e huicio democratico
Aruba ta na un momento crucial unda solamente e boluntad di e pueblo por haci un diferencia. Na final, e electorado lo husga democraticamente cada politico, minister, y parlamentario cu lo vota pro of contra di e leynan aki. E votacion aki lo significa e definicion di nan futuro den politica na Aruba, of lo e ta e dero final di nan carera hunto cu e Status Aparte cu nan mes ta kitando for di e pueblo di Aruba.
Mientras AVP ta duna nochi di informacion riba supuesto diferente logronan,congreso di AVP y actividad nan nobo. Aruba ta den un tristesa y ta luchando pa nan libertad,nan status aparte, nan autonomia y autodeterminacion, poder di nan parlamento, poder di nan voz como Arubiano, Sinembargo AVP ta demostra di no ta mustra e importancia na e pueblo .
.
Sinembargo di otro banda PPA y MEP ta informa comunidad riba nan derechonan y rumbo di Aruba actual cu votadonan cu ta luchando cu tur dia ta vocifera na nan y cu a firma contra di e Rijkswet HOFA y LWHO pa e rumbo di Aruba.