Awe, djadumingu 23 di aprel, den oranan di mardugá ‘meldkamer’ sentral a risibí notifikashon di Wardakosta ku nan boto di patruya a detektá un boto sospechoso bayendo direkshon di Lagun ku velosidat haltu for di Venezuela. Mes ora a despachá patruya di Polis pa e sitio i a enkontrá 4 persona huntu ku un beibi ku aparentemente tabata wardando e boto sospechoso aserká kosta. Na momentu ku e personanan riba e boto a mira moveshon di patruyanan, nan a kambia direkshon i bai direkshon di Lac. Patruyanan di Kuerpo Polisial Hulanda Karibense, Koninklijke Marechaussee, Duane i Wardakosta a logra interseptá e boto, pero ya e sospechosonan a logra hui for di e sitio. Algun ratu despues, polis a logra detené 2 sospechoso. Investigashon riba e boto a resultá den 37 saku di karkó a bordo kual a ser entregá na Duane.
A detené total 6 persona en konekshon ku e kaso aki. Ta trata aki di 4 hende hòmber: unu di 53 aña di edat di inisal C.B.A., unu di 48 aña di edat di inisal S.S.A., unu di 57 aña di edat di inisial J.J.M., i unu di 44 aña di edat di inisial R.G.F.T. Tambe a detené dos hende muhé: unu di 30 aña di edat di inisial J.J.C.A. i unu di 26 aña di edat di inisial D.M.G.V.
Polis a entregá e beibi na un familiar den akuerdo ku e departamentu di ‘Jeugdzorg’. Tambe a konfiská 2 vehíkulo ku ta pertenesé na e sospechosonan ku a keda detené na Lagun. E kaso ta sigui bou di investigashon.