Tourism Corporation Bonaire (TCB) huntu ku Entidat
Públiko Boneiru (OLB), Bonaire International Airport (BIA) i Bonaire Hotel and Tourism
Association (BONHATA) ta anunsiá lansamentu di e di dos temporada ku WestJet for di
Toronto pa Boneiru despues di éksito di e promé temporada ku a kuminsá na desèmber
2023.
For di 10 di desèmber 2024 WestJet ta reanudá e skema di temporada di wenter ku buelo
pa Boneiru riba djamars, ku salida for di Toronto pa 10:10 or, yegada na Boneiru pa 16:30
or i salida for di Boneiru riba djárason pa 09:00 or i yegada na Toronto pa 13:29 or. E
temporada ta dura te ku 30 di aprel 2025.
Miles Mercera, direktor di TCB: “Nos ta entusiasmá ku kontinuashon di nos kolaborashon
eksitoso ku WestJet pa un temporada mas ku buelo. E kolaborashon akí ta brinda
konektividat fásil pa bishitantenan kanades ku ta bin Boneiru, i ku anhelo nos ta spera un
otro temporada eksitoso atrobe.”
“Ta algu tremendo pa por yama WestJet bon biní atrobe durante e temporada di wenter
binidero na Aeropuerto Flamingo! E kontinuashon akí ta proba éksito di e ruta i ta indiká
ku ta eksistí un demanda robusto di Toronto pa Boneiru. E ruta semanal ta ranka sali un
tiki mas trempran, i e anunsio tempran akí ta duna tur hende sufisiente tempu pa reservá
nan pasashi. E ruta akí a engrandesé Boneiru su popularidat na Canada i nos ta hopi
kontentu di por yama bon biní na e bishitantenan akí un biaha mas na nos isla,” segun
Maarten van der Scheer, direktor di BIA.
“Nos ta sumamente kontentu di por yama bon biní na nos bishitantenan for di Canada pa
kompartí e eksperensia úniko di Boneiru ku nan. Nos ta spera di sigui traha huntu ku
WestJet riba un kolaborashon mutuo bentahoso i kontinuo pa por risibí nos amigunan
kanades durante henter aña,” asina diputado Clark Abraham a trese dilanti.
Veroesjka de Windt, direktor di BONHATA, a bisa: “Nos ta hopi kontentu ku kontinuashon
i ampliashon di e kolaborashon ku WestJet. E ampliashon akí ta mehorá nos oferta di
temporada i e ta nifiká un paso mas serka di posibilidatnan den futuro pa por yama bon
biní na bishitantenan for di Canada durante henter aña. Nos ta anhelá pa yama bon biní
na tantu bishitantenan ku ta bini bèk komo bishitantenan nobo ku ke deskubrí e enkanto
úniko i e hospitalidat kaluroso ku Boneiru tin pa ofresé. E ‘partnership’ akí ta un prueba di
e kolaborashon ku nos partnernan na nos isla i nos dedikashon pa hasi Boneiru aksesibel
i atraktivo pa un públiko mas amplio, di manera ku kada biahero ta haña un eksperensia
inolvidabel.”
Pa mas detaye i pa reservá bo buelo, bo por bishitá wèpsait di WestJet riba
www.westjet.com òf manda un email na marketing@bonaireisland.com.