Zr.Ms. Groningen ya durante e promé siman di patruya den Region Karibe, a realisá un redada enorme di droga. E Barku di Marina despues di un persiguishon tenas a interseptá riba dia 2 di febrüari último por lo ménos 3.000 kilo di kokaina den Laman Karibe. Durante esaki un motor di un boto transportando droga a keda destruí pa medio di tiru. 5 kontrabandista a keda detené. Esei a keda anunsiá awe.
Un dia promé ku e kaptura Wardakosta Region Karibe a mira un boto sospechoso riba radar di kosta. Zr.Ms. Groningen huntu ku e avion patruyero di Wardakosta a drenta akshon i a nabegá rumbo pa e boto. Despues di un persiguishon den anochi/mardugá e boto sin embargo a logra skapa.
Zr.Ms. Groningen no a entregá i a skohe pa tuma un posishon táktiko. Ku éksito. E siguiente mainta e boto a aparesé riba radar di e barku di Marina. Riba esei a desplegá e helikòpter NH90 di e barku di Marina huntu ku e botonan rápido di intersepshon (FRISC).
Nan tampoko no a logra stòp e kontrabandistanan ku a kousa basta traba. E kontrabandistanan a ignorá señalnan pa stòp i hasta tirunan di atvertensia tirá for di e FRISC. Finalmente e NH90 a logra stòp e boto ku tirunan dirigí ku a pone e motornan inmóbil. Na bordo ademas di e 5 kontrabandistanan tabatin por poko 94 pakete di kokaina, un total di 2.820 kilo. E sospechosonan i e droga a keda entregá na Wardakosta Merikano.
Barku Patruyero
Zr.Ms. Groningen for di fin di yanüari ta e barku stashoná den Region Karibe. E barku di Marina ta funshoná durante operashonnan anti droga interkambiando huntu ku Wardakosta Merikano i Wardakosta Region Karibe.
